tu hi behtar hai aaina ham se — Syed Mohammad Meer Asar

kin ne kahaa aur se na mil tu
par ham se bhi kabhu milaa kar

kyaa kahun kis tarah se jiitaa huun
gham ko khaataa huun aansu piitaa huun

bevafaa kuchh nahin teri taqsir
mujh ko meri vafaa hi raas nahin

apne nazdik dard-e-dil main kahaa
tere nazdik qissa-khvaani ki

kaam tujh se abhi to saaqi hai
ki zaraa ham ko hosh baaqi hai

jis ghaDi ghurte ho ghussa se
nikle paDtaa hai pyaar aankhon mein