yuun kaanptaa hai shaikh khayaal-e-sharaab se — Syed Zameer Jafri

aadmi se suluk duniyaa kaa
jaise anDaa talaa kare koi

— Syed Zameer Jafri

doctor bhi ho gae enginēr bhi ho gae
gandumi hai rang agar to dusre darje ke hain

— Syed Zameer Jafri

dilon kaa farsh bichhaa hai jidhar nigaah karo
tumhaaraa ghar bhi dilon kaa kabaaD-khaana hai

— Syed Zameer Jafri

miyaan 'gul-sher' tum bhi to havaa ke rukh ko pahchaano
jahaan saaDi chali jaati hai phulkaari nahin jaati

— Syed Zameer Jafri

Dar hai tote hi na khaa jaaein mujhe
naashpaati jaisaa sar rakhtaa huun main

— Syed Zameer Jafri

dard mein lazzat bahut ashkon mein raanaai bahut
ai gham-e-hasti hamein duniyaa pasand aai bahut

— Syed Zameer Jafri

na tum hosh mein ho na ham hosh mein hain
chalo mai-kade mein vahin baat hogi

— Bashir Badr

kisi ke zakhm par chaahat se paTTi kaun baandhegaa
agar bahnein nahin hongi to raakhi kaun baandhegaa

— Munawwar Rana

sau fasaad ek ishq mein uTThe
boyaa ik tukhm uge hazaar darakht

— Imdad Ali Bahr

koi saaghar pe saaghar pi rahaa hai koi tishna hai
murattab is tarah aain-e-mai-khaana nahin hotaa

— Haneef Akhgar

tumhaari yaad nikalti nahin mire dil se
nasha chhalaktaa nahin hai sharaab se baahar

— Faheem Shanas Kazmi

khudaa ke haath hai biknaa na biknaa mai kaa ai saaqi
baraabar masjid-e-jaame ke ham ne ab dukaan rakh di

— Riyaz Khairabadi