Syed Zameer Jafri

ab ik rumal mere saath ka hai
jo meri valida ke haath ka hai

ek lamha bhi masarrat ka bahut hota hai
log jiine ka saliqa hi kahan rakhte hain

un ka darvaza tha mujh se bhi siva mushtaq-e-did
main ne bahar kholna chaha to vo andar khula

ghar rahte to donon hain isi ek makan men
biivi ka jahan aur hai shauhar ka jahan aur

jitna baDhta gaya shu.ur-e-hunar
khud ko utna hi be-hunar jaana

kitna shatir hai siyasat-dan apne mulk ka
aur bhi maqbul ho jaata hai badnami ke baa'd

aadmi se suluk duniyaa kaa
jaise anDaa talaa kare koi

doctor bhi ho gae enginēr bhi ho gae
gandumi hai rang agar to dusre darje ke hain

dilon kaa farsh bichhaa hai jidhar nigaah karo
tumhaaraa ghar bhi dilon kaa kabaaD-khaana hai

yuun kaanptaa hai shaikh khayaal-e-sharaab se
jaise kabhi ye Duub gayaa thaa sharaab mein

miyaan 'gul-sher' tum bhi to havaa ke rukh ko pahchaano
jahaan saaDi chali jaati hai phulkaari nahin jaati

dard mein lazzat bahut ashkon mein raanaai bahut
ai gham-e-hasti hamein duniyaa pasand aai bahut