Shayari Of Aale Ahmad Suroor

"ham na is Tolī meñ the yaaro na us Tolī meñ the ne kisī kī jeb meñ the na kisī jholī meñ the banda-parvar sirf nazzāre pe qadġhan kis liye phuul phal jo baaġh ke the aap kī jholī meñ the aap ke nāroñ meñ lalkāroñ meñ kaise ā.eñge zamzame jo an-kahī ik pyaar kī bolī meñ the phir kisī kuufe meñ tanhā hai koī ibn-e-aqīl us ke sāthī sab ke sab sarkār kī Tolī meñ the ab dhanak ke rañg bhī un ko bhale lagte nahīñ mast saare shahr vaale ḳhuun kī holī meñ the"

"vo ji.eñ kyā jinheñ jiine kā hunar bhī na milā dasht meñ ḳhaak uḌāte rahe ghar bhī na milā ḳhas-o-ḳhāshāk se nisbat thī to honā thā yahī DhūñDne nikle the shole ko sharar bhī na milā na purānoñ se nibhī aur na na.e saath chale dil udhar bhī na milā aur idhar bhī na milā dhuup sī dhuup meñ ik umr kaTī hai apnī dasht aisā ki jahāñ koī shajar bhī na milā koī donoñ meñ kahīñ rabt-e-nihāñ hai shāyad but-kada chhūTā to allāh kā ghar bhī na milā haath uTThe the qadam phir bhī baḌhāyā na gayā kyā ta.ajjub jo duāoñ meñ asar bhī na milā bazm kī bazm huī raat ke jaadū kā shikār koī dil-dāda-e-afsūn-e-sahar bhī na milā"

"shaguftagī-e-dil-e-vīrāñ meñ aaj aa hī ga.ī ghaTā chaman pe bahāroñ ko le ke chhā hī ga.ī hayāt-e-tāza ke ḳhatroñ se dil dhaḌaktā thā havā chalī to kalī phir bhī muskurā hī ga.ī naqāb meñ bhī vo jalve na qaid ho paa.e kiran diloñ ke añdhere ko jagmagā hī ga.ī taġhāful ek bharam thā ġhurūr-e-jānāñ kā mirī nigāh-e-mohabbat kā ramz pā hī ga.ī mutālbe to bahut saḳht the zamāne ke magar huqūq-e-mohabbat kī yaad aa hī ga.ī mire junūñ kī ḳhalish se ab aur kyā hotā sukūt-e-ahl-e-ḳhirad ko to aazmā hī ga.ī matā-e-qalb-o-nazar ḳhaak hote hote bhī jahān-e-husn kī kuchh aabrū baḌhā hī ga.ī thapak thapak ke sulāyā jo tum ne zauq-e-suḳhan 'surūr' is ko kisī kī nazar jagā hī ga.ī"

"ham barq-o-sharar ko kabhī ḳhātir meñ na laa.e us fitna-e-daurāñ ko magar dekh na paa.e go qatre meñ dariyāoñ kā tūfān samā.e par shauq kī rūdād kab alfāz meñ aa.e zulfoñ ko diyā hai ruḳh-e-zebā ne ajab rañg jalvoñ se tire aur bhī raushan hue saa.e ye ishq ke sho.ale bhī ajab chīzeñ haiñ ya.anī jo aag lagā.e vahī ḳhud aag bujhā.e Dhaltī hai vo mai ik tire paimāne meñ saaqī mastī ko bhī jo hosh ke ādāb sikhā.e terī hī nigāhoñ kā tasarruf thā ki ham ne rānā.i-e-afkār ke e.ajāz dikhā.e jis dil pe kisī kī nigah-e-lutf paḌī thī baiThe haiñ 'surūr' us ko kaleje se lagā.e"

"ḳhudā-parast mile aur na but-parast mile mile jo log vo apne nashe meñ mast mile kahīñ ḳhud apnī durustī kā dukh nahīñ dekhā bahut jahāñ kī durustī ke bandobast mile kahīñ to ḳhāk-nashīñ kuchh buland bhī hoñge hazāroñ apnī bulandī meñ kitne past mile ye sahl fat.h to phīkī sī lag rahī hai mujhe kisī aziim muhim meñ kabhī shikast mile ye shāḳh-e-gul kī lachak bhī payām rakhtī hai basān-e-teġh the jo ham ko haq-parast mile sunā hai chand tahī-dāmanoñ meñ zarf to thā 'surūr' ham ko tavañgar bhī tañg-dast mile"

"ḳhushk khetī hai magar us ko harī kahte haiñ kam-nigāhī ko bhī vo dīda-varī kahte haiñ fikr-e-raushan ko vo shorīda-sarī kahte haiñ yā'nī sūraj ko charāġh-e-saharī kahte haiñ jo tire dar se uThā phir vo kahīñ kā na rahā us kī qismat meñ rahī dar-badarī kahte haiñ kitnī be-rahm hai fitrat unheñ mā'lūm nahīñ jo use kārgah-e-shīshagarī kahte haiñ husn ke baab meñ 'akbar' kī sanad kaafī hai ham bhī har ik but-e-kamsin ko parī kahte haiñ rūh-e-sayyad pe ḳhudā jaane guzar jā.egī kyā aam aligaḌh meñ huī kam-nazarī kahte haiñ"

"vo ehtiyāt ke mausam badal ga.e kaise charāġh dil ke añdhere meñ jal ga.e kaise banā diyā thā zamāne ne barf ke mānind ham ek shoḳh kiran se pighal ga.e kaise umiid jin se thī vaz-e-junūñ nibhāne kī vo log vaqt ke sāñche meñ Dhal ga.e kaise sitāre jazb hue gard-e-rāh meñ kyā kyā ḳhayāl-o-ḳhvāb ke aa.iiñ badal ga.e kaise ḳhizāñ se jin ko bachā laa.e the jatan kar ke vo naḳhl ab ke bahāroñ meñ jal ga.e kaise na jaane kyuuñ jinheñ samjhe the ham farishte haiñ qarīb aa.e to chehre badal ga.e kaise har ek sāya-e-dīvār kī lapeT meñ hai 'surūr' aap hī bach kar nikal ga.e kaise"

"kuchh log taġhayyur se abhī kaañp rahe haiñ ham saath chale to haiñ magar haañp rahe haiñ nāroñ se siyāsat kī haqīqat nahīñ chhuptī uryāñ hai badan laakh use Dhāñp rahe haiñ kyā baat hai shahroñ meñ simaT aa.e haiñ saare jañgal meñ to gintī ke hī kuchh saañp rahe haiñ makḌī kahīñ makkhī ko giraftār na kar le vo shoḳh-nigāhoñ se mujhe bhāñp rahe haiñ ye jhuuT hai yā sach hai samajh meñ nahīñ aatā sach bolne meñ hoñT mire kaañp rahe haiñ"

"ye daur mujh se ḳhirad kā vaqār māñge hai dil ab bhī shauq ke lail-o-nahār māñge hai jahāñ meñ kis ko gavārā huī hai fikr kī dhuup har ik, koī shajar-e-sāya-dār māñge hai zabān lāla-o-gul meñ basī huī hai magar zamāna lafz meñ ḳhanjar kī dhaar māñge hai akele-pan kā ye ehsās ham-nafas kī talāsh baḌhī huī jo ye talḳhī hai pyaar māñge hai ye aadmī mire ḳhvāboñ kā saath kyā detā haqīqatoñ se jo aksar farār māñge hai ab in meñ apnā lahū ho ki koī shoḳh kiran varaq jo saada hai naqsh-o-nigār māñge hai huā kahāñ abhī sadiyoñ ke jabr se āzād ḳhudā.ī par jo bashar iḳhtiyār māñge hai bhikāriyoñ ko yahāñ bhiik kaun detā hai hai sāda-lauh jo duniyā se pyaar māñge hai vo dīda-var jise pahchāntī nahīñ mahfil tirī nazar se faqat e'tibār māñge hai"

"fuġhān-e-dard meñ bhī dard kī ḳhalish hī nahīñ diloñ meñ aag lagī hai magar tapish hī nahīñ kahāñ se laa.eñ vo soz-o-gudāz dil vaale ki dilbarī kā vo āhañg vo ravish hī nahīñ haqīqatoñ ke bhī tevar badal to sakte haiñ hamārī bazm meñ ḳhvāboñ kī vo ḳhalish hī nahīñ dimāġh kyuuñ na ho sāhil pe sone vāloñ kā kabhī kabhār jo tūfāñ kī sarzanish hī nahīñ lubhā.egā use kyā chāñd kā ḳhunuk jaadū jise nasīb kaḌī dhuup kī tapish hī nahīñ zamāna qissa-e-dār-o-rasan ko bhuul na jaa.e kisī ke halqa-e-gesū meñ vo kashish hī nahīñ ye rañg-o-bū ke tilismāt kis liye haiñ 'surūr' bahār kyā hai junūñ kī jo parvarish hī nahīñ"

"yuuñ jo uftād paḌe ham pe vo sah jaate haiñ haañ kabhī baat jo kahne kī hai kah jaate haiñ na chaTānoñ kī salābat hai na dariyā kā jalāl log tinke haiñ jo har mauj meñ bah jaate haiñ ye na.ī nasl hai is vāste ḳhālī ḳhālī dard jitne haiñ vo bātoñ hī meñ bah jaate haiñ aamad aamad kisī ḳhurshīd-e-jahāñ-tāb kī hai peshvā.ī ke liye anjum o mah jaate haiñ zindagī ban ga.ī dīvānoñ kī ik dauḌ 'surūr' ham se kitne haiñ jo is dauḌ meñ rah jaate haiñ"

"lo añdheroñ ne bhī andāz ujāloñ ke liye kaisī uftād paḌī dekhne vāloñ ke liye tāza-kārī ne vahāñ kar diye aalam ījād ham taraste hī rahe taaza ḳhayāloñ ke liye shāh-rāhoñ se guzarte haiñ shab-o-roz hujūm na.ī rāheñ haiñ faqat chand jiyāloñ ke liye kaam maazī kī ye sāda-nigahī kyā aatī asr-e-hāzir tire pechīda savāloñ ke liye kitnī sham.eñ bujhīñ nādīda kiran kī ḳhātir kitne sūraj liye mauhūm ujāloñ ke liye kitne sañgīn haqā.eq se nichoḌā hai lahū chand ḳhvāboñ ke liye chand ḳhayāloñ ke liye go nigah-dārī-e-ādāb-e-junūñ mushkil hai phir bhī āsāñ hai tire chāhne vāloñ ke liye"