All Writings Of Aasi Aarwi

"rūdād-e-ġham meñ DhūñDiye lutf-e-bayāñ nahīñ ye to hadīs-e-dil hai koī dāstāñ nahīñ shikva nahīñ gila nahīñ āh-o-fuġhāñ nahīñ apnā jo haal hai vo kisī par ayaañ nahīñ apnā yaqīñ kabhī bhī asīr-e-gumāñ nahīñ ai shaiḳh un ke mere koī darmiyāñ nahīñ ai dil jafā-e-ahl-e-jahāñ se na ho malūl in kī razā jo ho to musībat garāñ nahīñ kyā DhūñDhtā hai is meñ ġham-o-rañj ke sivā ye merī dāstāñ hai tirī dāstāñ nahīñ ishq-e-sitam samajh ke zarā ai nigāh-e-dost ye terā imtihāñ hai mirā imtihāñ nahīñ hairān huuñ vahāñ maiñ kahūñ kyā zabān se 'āsī' nigāh dil kī jahāñ tarjumāñ nahīñ"

"tirī barbādiyoñ kā zikr bazm-e-dil-brāñ tak hai kahāñ kī baat hai ai dil magar pahuñchī kahāñ tak hai tū kyā jaane mohabbat ke maze ai nāseh-e-nādāñ pahuñch tirī nigāhoñ kī faqat sūd-o-ziyāñ tak hai ham insāñ haiñ magar taḳhlīq-e-a.alā haiñ ki ai hamdam hamāre auj kā charchā zamīñ se āsmāñ tak hai mohabbat āzmātī hai mohabbat karne vāloñ ko ye saḳhtī ai dil-e-betāb tujh par imtihāñ tak hai jahāñ meñ vaise to jiite haiñ sab lekin jo sach pūchho maza jiine kā duniyā meñ bahār-e-dostāñ tak hai koī jab dost kahtā hai to sun letā huuñ ai 'āsī' ki ab to dostī is ahd meñ husn-e-bayāñ tak hai"

"dekhā hai ik nazar unheñ anjām jo bhī ho qismat meñ apnī ai dil-e-nākām jo bhī ho merī nazar pe saarā zamāna hai mo'tariz lekin vo ik adā hai lab-e-bām jo bhī ho imkān phir rihā.ī kī kartā hai koshisheñ murġh-e-balā-nasīb tah-e-dām jo bhī ho kuchh īn-o-āñ ko daḳhl nahīñ rāh-e-ishq meñ ab un kā mere vāste paiġhām jo bhī ho āñkhoñ meñ vaqt-e-dīd kuchh aañsū zarūr the ham par ab is ke vāste ilzām jo bhī ho kahtā hai dil kī baat magar apne sher meñ qismat kā maarā 'āsī'-e-gumnām jo bhī ho"

"na aanā thā na aayā aane vaalā gayā duniyā se āḳhir jaane vaalā chhupāo laakh tum apne ko lekin tumheñ pā kar rahegā paane vaalā mohabbat ko samajh se vāsta kyā kaho ab chup rahe samjhāne vaalā yahāñ be-sūd hai zikr-e-ġham-e-dil yahāñ koī nahīñ ġham khāne vaalā mujhe to hai ġharaz insāniyat se haram vaalā ho yā but-ḳhāne vaalā samajhne vaalā ab koī nahīñ hai jise dekho vo hai samjhāne vaalā hazāroñ milte haiñ ġham dene vaale koī miltā nahīñ ġham khāne vaalā sabhī kā tum to ġham khāte ho 'āsī' tumhārā kaun hai ġham khāne vaalā"

"kyā pūchhte ho hāl-e-dil-e-be-qarār aaj jo kal thī hai vo gardish-e-lail-o-nahār aaj us paikar-e-jafā ko na kos ai dil-e-hazīñ terī tarah hai vo bhī bahut be-qarār aaj mere hī dam se rah gayā mai-ḳhāne meñ bharam varna janāb-e-shaiḳh ko miltā udhār aaj us ne likhā hai bahr-ayādat kal ā.eñge jiine bhī degā mujh ko dil-e-be-qarār aaj kis mast kī duā huī maqbūl-e-bārgāh aayā hai jhuum jhuum ke abr-e-bahār aaj mere liye kahīñ bhī jahāñ meñ sukūñ nahīñ le kar kahāñ chalā hai dil-e-be-qarār aaj us gul ne jaane kyā mire baare meñ kah diyā guzrī hai mujh se kaT ke nasīm-e-bahār aaj ye faiz hai 'tabīb'-o-'qatīl' aur 'zār' kā 'āsī' jo shā.iroñ meñ hai terā shumār aaj"

"chāhe jo haal bhī ho un kī nazar hone tak ham jiye jā.eñge aahoñ meñ asar hone tak be-ḳhudī naam hai ehsās-e-ḳhudī kā shāyad varna kuchh aur thā mansūr ḳhabar hone tak sabr se kaam le ai dil is añdhere se na Dar zulmat-e-shab hai sapedī-e-sahar hone tak jab jo chāheñ vo kaheñ apne ko vaa.iz lekin bartarī mujh ko to hāsil hai bashar hone tak haa.e vo husn-e-yaqīñ aah vo ummīd-e-karam muntazir thā tirā bīmār sahar hone tak yuuñ to jiinā hai ba-har-hāl magar ai 'āsī' zindagī asl meñ hai soz-e-jigar hone tak"

"hazār zaḳhm haiñ dil par jigar pe khaa.e hue magar mile jo kisī se to muskurā.e hue kuchh is adā se vo aa.e nazar jhukā.e hue tamām rah ga.e shikve zabāñ pe aa.e hue udhar to sāġhar-o-paimāna vaale rahte haiñ udhar kahāñ chale vaa.iz qadam baḌhā.e hue baḌho kuchh aur ki tārīkī-e-jafā kam ho isī tarah se charāġh-e-vafā jalā.e hue hameñ satāne se baaz aaoge yaqīñ to nahīñ tumhāre kitne hī va.ade haiñ āzmā.e hue tumhāre tīr-e-nazar ko kisī ne kuchh na kahā hamārī aah ko haiñ dāstāñ banā.e hue hamārā zikr aur is mai-kade meñ ai 'āsī' yahāñ to shaiḳh-o-barahman haiñ Dagmagā.e hue"

"kahāñ kisī kī nazar hai tirī nazar kī tarah jo kaam dil kā bhī kartī chale jigar kī tarah bahut se aise bhī duniyā meñ log milte haiñ jo bā-ḳhabar haiñ magar haiñ vo be-ḳhabar kī tarah ye barbariyat-o-vahshat ye aag aur ye dhuāñ bashar ko rahnā bhī mushkil hai ab bashar kī tarah asīr-e-hūr haiñ vaa.iz ab un kī kaun sune kahānī aap kī hai tūl-e-muḳhtasar kī tarah barasne ko to barastā hai abr-e-naisāñ bhī magar baras na sakā merī chashm-e-tar kī tarah na jaane kaun se aalam meñ gum huā 'āsī' na bā-ḳhabar kī tarah hai na be-ḳhabar kī tarah"

"ḳhirad vaalā bhī apne aap se begāna aatā hai jo un kī bazm se aatā hai vo dīvāna aatā hai na josh-e-mai na kaif-e-naġhma-e-rindāna aatā hai ik aisā vaqt bhī ai sāqi-e-mai-ḳhāna aatā hai bayān-e-dard dil ko vā.iz-e-farzāna aatā hai vo kyā jaane haqīqat us ko to afsāna aatā hai maiñ chaltā to huuñ ghar se jānib-e-masjid magar nāseh qadam ruk jaate haiñ raste meñ jab mai-ḳhāna aatā hai ḳhirad vāloñ se jab hal mas.aloñ ke ho nahīñ paate to phir is kaam kī ḳhātir koī dīvāna aatā hai bahut mushkil hai in se bach ke rūdād-e-alam kahnā ki afsāne se pahle sāhab-e-afsāna aatā hai na jaane kaun sī lazzat hai is sozish meñ ai 'āsī' ki pesh-e-sham.a jalne ke liye parvāna aatā hai"

"na qahqaha na tabassum na ashk paiham hai jahāñ pe ham haiñ vahāñ kuchh ajiib aalam hai jo pahle aaj se thā aaj bhī vahī ġham hai ye daur-e-jām nahīñ hai fareb-e-paiham hai burā na maano to ik baat tum se arz karūñ tumhārā lutf ba-andāza-e-sitam kam hai ye sub.h-o-shām kī mastī ye nashsha-e-shab-o-roz tire baġhair koī kaif ho mujhe sam hai sar-e-niyāz kabhī us ke sāmne na jhukā isī qusūr pe ham se zamāna barham hai hai baat baat pe hajv-e-subū-o-sāġhar-o-mai janāb-e-hazrat-e-vā.is se naak meñ dam hai nigāh-e-nāz ko taklīf-e-iltifāt na do ki ab to zaḳhm-e-jigar be-niyāz-e-marham hai ḳhatā zarūr koī us se bhī huī hogī ki āḳhir 'āsī'-e-ḳhasta bhī ibn-e-ādam hai"

"har shāḳh-e-gul ko be-sar-o-sāmāñ banā diyā yāroñ ne gulsitāñ ko bayābāñ banā diyā taḳhlīq sab kī ek hai a.amāl ne magar kāfir tujhe to mujh ko musalmāñ banā diyā is jān-e-gulsitāñ kī tamannā ne ai nadīm mujh ko har ik chaman se gurezāñ banā diyā dushvār ho chukī thī mujhe zindagī magar sāqī-e-dil-navāz ne āsāñ banā diyā 'āsī' ḳhudā kā shukr karo jis ke lutf ne auroñ ke saath tum ko bhī insāñ banā diyā"

"dayār-e-ishq meñ vaa.iz ḳhirad kā kaam nahīñ udhar na bhuul ke jaanā vo rāh-e-ām nahīñ vo sub.h sub.h nahīñ hai vo shaam shaam nahīñ ki jis meñ un kī taraf se koī payām nahīñ vo rāh-rau huuñ ki manzil nahīñ qayām nahīñ talāsh-e-dost meñ kuchh qaid-e-sub.h-o-shām nahīñ ye kaif-e-ishq hai vaqtī surūr-e-jām nahīñ tirī tarah mirā nāseh ḳhayāl ḳhaam nahīñ nigāh-e-qahr kā markaz thā kaun mahfil meñ huzūr kahte haiñ terā koī maqām nahīñ ye falsafa ye siyāsat ye hikmat-o-dānish kahāñ kahāñ mirī ḳhātir kamand-o-dām nahīñ vo dars dete haiñ aḳhlāq kā ab ai 'āsī' salām kījiye jin ko to leñ salām nahīñ"