rudaad-e-gham mein DhunDiye lutf-e-bayaan nahin — Aasi Aarwi

"na aanaa thaa na aayaa aane vaalaa gayaa duniyaa se aakhir jaane vaalaa chhupaao laakh tum apne ko lekin tumhein paa kar rahegaa paane vaalaa mohabbat ko samajh se vaasta kyaa kaho ab chup rahe samjhaane vaalaa yahaan be-sud hai zikr-e-gham-e-dil yahaan koi nahin gham khaane vaalaa mujhe to hai gharaz insaaniyat se haram vaalaa ho yaa but-khaane vaalaa samajhne vaalaa ab koi nahin hai jise dekho vo hai samjhaane vaalaa hazaaron milte hain gham dene vaale koi miltaa nahin gham khaane vaalaa sabhi kaa tum to gham khaate ho 'aasi' tumhaaraa kaun hai gham khaane vaalaa"

"kyaa puchhte ho haal-e-dil-e-be-qaraar aaj jo kal thi hai vo gardish-e-lail-o-nahaar aaj us paikar-e-jafaa ko na kos ai dil-e-hazin teri tarah hai vo bhi bahut be-qaraar aaj mere hi dam se rah gayaa mai-khaane mein bharam varna janaab-e-shaikh ko miltaa udhaar aaj us ne likhaa hai bahr-ayaadat kal aaeinge jiine bhi degaa mujh ko dil-e-be-qaraar aaj kis mast ki duaa hui maqbul-e-baargaah aayaa hai jhuum jhuum ke abr-e-bahaar aaj mere liye kahin bhi jahaan mein sukun nahin le kar kahaan chalaa hai dil-e-be-qaraar aaj us gul ne jaane kyaa mire baare mein kah diyaa guzri hai mujh se kaT ke nasim-e-bahaar aaj ye faiz hai 'tabib'-o-'qatil' aur 'zaar' kaa 'aasi' jo shaairon mein hai teraa shumaar aaj"

"har shaakh-e-gul ko be-sar-o-saamaan banaa diyaa yaaron ne gulsitaan ko bayaabaan banaa diyaa takhliq sab ki ek hai aamaal ne magar kaafir tujhe to mujh ko musalmaan banaa diyaa is jaan-e-gulsitaan ki tamannaa ne ai nadim mujh ko har ik chaman se gurezaan banaa diyaa dushvaar ho chuki thi mujhe zindagi magar saaqi-e-dil-navaaz ne aasaan banaa diyaa 'aasi' khudaa kaa shukr karo jis ke lutf ne auron ke saath tum ko bhi insaan banaa diyaa"

"chaahe jo haal bhi ho un ki nazar hone tak ham jiye jaaeinge aahon mein asar hone tak be-khudi naam hai ehsaas-e-khudi kaa shaayad varna kuchh aur thaa mansur khabar hone tak sabr se kaam le ai dil is andhere se na Dar zulmat-e-shab hai sapedi-e-sahar hone tak jab jo chaahein vo kahein apne ko vaaiz lekin bartari mujh ko to haasil hai bashar hone tak haae vo husn-e-yaqin aah vo ummid-e-karam muntazir thaa tiraa bimaar sahar hone tak yuun to jiinaa hai ba-har-haal magar ai 'aasi' zindagi asl mein hai soz-e-jigar hone tak"

"dekhaa hai ik nazar unhein anjaam jo bhi ho qismat mein apni ai dil-e-naakaam jo bhi ho meri nazar pe saaraa zamaana hai mo'tariz lekin vo ik adaa hai lab-e-baam jo bhi ho imkaan phir rihaai ki kartaa hai koshishein murgh-e-balaa-nasib tah-e-daam jo bhi ho kuchh in-o-aan ko dakhl nahin raah-e-ishq mein ab un kaa mere vaaste paighaam jo bhi ho aankhon mein vaqt-e-did kuchh aansu zarur the ham par ab is ke vaaste ilzaam jo bhi ho kahtaa hai dil ki baat magar apne sher mein qismat kaa maaraa 'aasi'-e-gumnaam jo bhi ho"

"tiri barbaadiyon kaa zikr bazm-e-dil-braan tak hai kahaan ki baat hai ai dil magar pahunchi kahaan tak hai tu kyaa jaane mohabbat ke maze ai naaseh-e-naadaan pahunch tiri nigaahon ki faqat sud-o-ziyaan tak hai ham insaan hain magar takhliq-e-aalaa hain ki ai hamdam hamaare auj kaa charchaa zamin se aasmaan tak hai mohabbat aazmaati hai mohabbat karne vaalon ko ye sakhti ai dil-e-betaab tujh par imtihaan tak hai jahaan mein vaise to jiite hain sab lekin jo sach puchho maza jiine kaa duniyaa mein bahaar-e-dostaan tak hai koi jab dost kahtaa hai to sun letaa huun ai 'aasi' ki ab to dosti is ahd mein husn-e-bayaan tak hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"