Abdul Rahman Ehsan Dehlvi

ulfat men tera rona 'ehsan' bahut baja hai
har vaqt menh ka hona ye rahmat-e-khuda hai

us lab-e-bam se ai sarsar-e-furqat tu bata
misl tinke ke mira ye tan-e-laghar phenka

vo aag lagi paan chaba.e se kasu ki
ab tak nahin bujhti hai bujha.e se kasu ki

to bhi us tak hai rasa.i mujhe ehsan dushvar
daam luun gar par-e-jibril bara-e-parvaz

filfil-e-khal-e-malahat ke tasavvur men tire
charcharahaT hai kabab-e-dil-e-biryan men kya

agar baiTha hi naseh munh ko si baiTh
vagarna yaan se uTh ai be-haya ja

namaaz apni agarche kabhi qazaa na hui
adaa kisi ki jo dekhi to phir adaa na hui

gale se lagte hi jitne gile the bhuul gae
vagarna yaad thiin ham ko shikaayatein kyaa kyaa

dil-rubaa tujh saa jo dil lene mein ayyaari kare
phir koi dilli mein kyaa dil ki khabardaari kare

aag is dil-lagi ko lag jaae
dil-lagi aag phir lagaane lagi

ba-vaqt-e-bosa-e-lab kaash ye dil kaamraan hotaa
zabaan us bad-zabaan ki munh mein aur main zabaan hotaa

mai-kade mein ishq ke kuchh sarsari jaanaa nahin
kaasa-e-sar ko yahaan gardish hai paimaane ki tarah