All Writings Of Adnan Munawar

"chashm-e-girya pe dhuāñ thā pahle din meñ bhī shab kā gumāñ thā pahle zaḳhm to thā magar ai rāhat-e-jāñ is qadar dard kahāñ thā pahle naam lenā bhī nahīñ ab to ravā maiñ tire dil kī zabāñ thā pahle tere chhūne se huā huuñ sarsabz maiñ to ik barg-e-ḳhizāñ thā pahle jam gayā tere bichhaḌne se lahū ye rag-o-pai meñ ravāñ thā pahle ab nikaltā nahīñ ghar se 'adnān' shahr kī rūh-e-ravāñ thā pahle"

"shahr-bhar meñ mujhe aise na ghumāyā jaatā is mohabbat ko tamāshā na banāyā jaatā maiñ ki jis chaak pe TuuTā thā tire hāthoñ se kaash us chaak pe ab phir se banāyā jaatā yaad rakhne kī aziyyat se guzarne ke liye bhūlne kā bhī hunar mujh ko sikhāyā jaatā dhuup hotī to mujhe itnī suhūlat rahtī maiñ na jaatā bhī to us tak mirā saaya jaatā ik na.e zaḳhm kī hai dil ko zarūrat 'adnān' ab purāne se nahīñ kaam chalāyā jaatā"

"hai pur-raunaq magar vīrān sī mahsūs hotī hai bharī mahfil meñ bhī terī kamī mahsūs hotī hai use dekhūñ to duniyā ḳhūb-sūrat lagne lagtī hai use chhū luuñ to mujh ko zindagī mahsūs hotī hai mirī āñkhoñ meñ āñkheñ Daal kar ye to batāo tum tumheñ bhī kyā mohabbat sī kabhī mahsūs hotī hai tumhārā haath shāmil hī nahīñ merī tabāhī meñ batāo kyoñ tumheñ sharmindagī mahsūs hotī hai maiñ apnī justujū meñ jā-ba-jā phirtā huuñ sargardāñ magar duniyā ko ye āvārgī mahsūs hotī hai jahāñ 'adnān' merī maañ kā chehra sāmne aa.e vahāñ manzar meñ kaisī tāzgī mahsūs hotī hai"

"ham ne qismat se jo ye vaqt guzārā raushan kyā falak par hai kahīñ koī sitāra raushan thak gayā huuñ maiñ bahut roz kī tārīkī se koī kar de mire manzar ko ḳhudārā raushan ai mire yaar tirī lau kī zarūrat hai ki aaj mujhe karnā hai bujhe dil ko dubāra raushan ḳhush-nazar shaḳhs tū jaatā hai usī jānib kyoñ jis taraf hai hī nahīñ koī ishāra raushan varna maiñ chaak pe hī raakh huā jaatā thā tere chhūne se huā hai mirā gaarā raushan"

"umīd-vār to barg-o-samar ke ham bhī haiñ shajar na kaaT ki shāḳh-e-shajar ke ham bhī haiñ ye aur baat ki dāman na mil sakā ham ko gire hue to kisī chashm-e-tar ke ham bhī haiñ subuk-ravāñ-e-mohabbat na yuuñ hañso ham par shikasta-pā sahī is rah-guzar ke ham bhī haiñ ye aur baat hamārī ḳhabar nahīñ rakhtā hameñ ḳhabar hai kisī bā-ḳhabar ke ham bhī haiñ ai ahl-e-qāfila tanhā safar bhī saḳht nahīñ hamārā zād-e-safar hai safar ke ham bhī haiñ"

"yād-e-yārāñ ko kaf-e-dil meñ chubhote hue ham ghar ke kone meñ paḌe rahte haiñ rote hue ham nīm-shab aur ye aañsū haiñ ki rukte hī nahīñ haa.e pardes meñ takiyoñ ko bhigote hue ham har na.ī sub.h se ummīd-e-pazīrā.ī liye chādar-e-ḳhāk ke parde meñ samote hue ham raat us bazm meñ ik tū hī shanāsā thā magar kitne tanhā nazar aa.e tire hote hue ham mar hī jā.eñge tirī yaad meñ yūñhī kisī roz dukh ke āñchal meñ kahīñ she'r pirote hue ham sarsarāhaT sī kahīñ zulf-e-girah-gīr meñ thī Dar ga.e aaj tire saa.e meñ sote hue ham"

"jagmagāte shahr kī tah jagmagātī ret hai āsmānī ḳhvāb haiñ aur kā.enātī ret hai hai samundar ke laboñ par shādiyānoñ kī sadā sāhiloñ par apnī dhun meñ gungunātī ret hai uḌte phirte haiñ havā ke saath zarroñ kī tarah zindagī ke roz-o-shab kī be-sabātī ret hai ye masāfat tishnagī hai aur maiñ sahrā meñ huuñ phāñktā paanī huuñ lekin muñh meñ aatī ret hai is safar meñ bārhā āñkhoñ ne dekhe haiñ sarāb maujzan paanī kī sūrat jhilmilātī ret hai ik fasāna likh rahā hai sārbān-e-zindagī vāqi’ātī qāfile haiñ hādsātī ret hai"

"haa.e kyā manzar the jo āñkhoñ se ojhal ho ga.e hañste baste shahr bhī vīrān jangal ho ga.e pāgaloñ ko log to rakhte haiñ zanjīroñ meñ qaid ham tirī zanjīr se nikle to pāgal ho ga.e dekh tū ne dard ke rangoñ se ham ko bhar diyā dekh ham tasvīr-e-ġham ban kar mukammal ho ga.e is tag-o-dau meñ ki saarī 'umr ho tere liye dost ham apne liye guzrā huā pal ho ga.e maiñ khule maidān meñ yak-laḳht aa kar ruk gayā sāmne the hī nahīñ jo dar muqaffal ho ga.e shahr saarā us kī āñkhoñ meñ kahīñ gum ho gayā us ko jitne dekhne vaale the pāgal ho ga.e ham bahāne DhūñDte the zindagī ke vāste tere aane se hamāre mas.ale hal ho ga.e"

"der se dil par asar kartā huuñ maiñ kaam mushkil hai magar kartā huuñ maiñ maiñ tujhe ḳhud se judā kaise karūñ jaan jaatī hai agar kartā huuñ maiñ maiñ hī maiñ huuñ jis taraf jaatā hai tū tū hī tū hai ruḳh jidhar kartā huuñ maiñ rauñdtā huuñ rāste pairoñ tale nāchte gaate safar kartā huuñ maiñ phuul se kartā huuñ maiñ ḳhushbū kashīd rā.egānī ko samar kartā huuñ maiñ be-gharī 'adnān' baḌh jaatī hai kyoñ jab kisī ke dil meñ ghar kartā huuñ maiñ"

"kabhī zamīn kabhī āsmāñ banātā huuñ yahāñ maiñ ret pe kitne makāñ banātā huuñ 'ajīb tarz kī tasvīr bantī jaatī hai ab is meñ dekhnā maiñ dil kahāñ banātā huuñ makān aag meñ jaltā banā liyā pahle ab āsmān talak maiñ dhuāñ banātā huuñ zamīñ pe khīñch ke laatā huuñ abr kā TukḌā musāfiroñ ke liye sā.ebāñ banātā huuñ purāne peḌ pe ik saañp kā baserā hai na.ī jagah pe kahīñ āshiyāñ banātā huuñ"