der se dil par asar kartaa huun main — Adnan Munawar

"jagmagaate shahr ki tah jagmagaati ret hai aasmaani khvaab hain aur kaaenaati ret hai hai samundar ke labon par shaadiyaanon ki sadaa saahilon par apni dhun mein gungunaati ret hai uDte phirte hain havaa ke saath zarron ki tarah zindagi ke roz-o-shab ki be-sabaati ret hai ye masaafat tishnagi hai aur main sahraa mein huun phaanktaa paani huun lekin munh mein aati ret hai is safar mein baarhaa aankhon ne dekhe hain saraab maujzan paani ki surat jhilmilaati ret hai ik fasaana likh rahaa hai saarbaan-e-zindagi vaaqi’aati qaafile hain haadsaati ret hai"

"yaad-e-yaaraan ko kaf-e-dil mein chubhote hue ham ghar ke kone mein paDe rahte hain rote hue ham nim-shab aur ye aansu hain ki rukte hi nahin haae pardes mein takiyon ko bhigote hue ham har nai subh se ummid-e-paziraai liye chaadar-e-khaak ke parde mein samote hue ham raat us bazm mein ik tu hi shanaasaa thaa magar kitne tanhaa nazar aae tire hote hue ham mar hi jaaeinge tiri yaad mein yunhi kisi roz dukh ke aanchal mein kahin she'r pirote hue ham sarsaraahaT si kahin zulf-e-girah-gir mein thi Dar gae aaj tire saae mein sote hue ham"

"hai pur-raunaq magar viraan si mahsus hoti hai bhari mahfil mein bhi teri kami mahsus hoti hai use dekhun to duniyaa khub-surat lagne lagti hai use chhu luun to mujh ko zindagi mahsus hoti hai miri aankhon mein aankhein Daal kar ye to bataao tum tumhein bhi kyaa mohabbat si kabhi mahsus hoti hai tumhaaraa haath shaamil hi nahin meri tabaahi mein bataao kyon tumhein sharmindagi mahsus hoti hai main apni justuju mein jaa-ba-jaa phirtaa huun sargardaan magar duniyaa ko ye aavaargi mahsus hoti hai jahaan 'adnaan' meri maan kaa chehra saamne aae vahaan manzar mein kaisi taazgi mahsus hoti hai"

"kabhi zamin kabhi aasmaan banaataa huun yahaan main ret pe kitne makaan banaataa huun 'ajib tarz ki tasvir banti jaati hai ab is mein dekhnaa main dil kahaan banaataa huun makaan aag mein jaltaa banaa liyaa pahle ab aasmaan talak main dhuaan banaataa huun zamin pe khinch ke laataa huun abr kaa TukDaa musaafiron ke liye saaebaan banaataa huun puraane peD pe ik saanp kaa baseraa hai nai jagah pe kahin aashiyaan banaataa huun"

"ham ne qismat se jo ye vaqt guzaaraa raushan kyaa falak par hai kahin koi sitaara raushan thak gayaa huun main bahut roz ki taariki se koi kar de mire manzar ko khudaaraa raushan ai mire yaar tiri lau ki zarurat hai ki aaj mujhe karnaa hai bujhe dil ko dubaara raushan khush-nazar shakhs tu jaataa hai usi jaanib kyon jis taraf hai hi nahin koi ishaara raushan varna main chaak pe hi raakh huaa jaataa thaa tere chhune se huaa hai miraa gaaraa raushan"

"umid-vaar to barg-o-samar ke ham bhi hain shajar na kaaT ki shaakh-e-shajar ke ham bhi hain ye aur baat ki daaman na mil sakaa ham ko gire hue to kisi chashm-e-tar ke ham bhi hain subuk-ravaan-e-mohabbat na yuun hanso ham par shikasta-paa sahi is rah-guzar ke ham bhi hain ye aur baat hamaari khabar nahin rakhtaa hamein khabar hai kisi baa-khabar ke ham bhi hain ai ahl-e-qaafila tanhaa safar bhi sakht nahin hamaaraa zaad-e-safar hai safar ke ham bhi hain"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"