Shayari Of Ahmad Fareed

"ye jo ik sail-e-fanā hai mire pīchhe pīchhe mere hone kī sazā hai mire pīchhe pīchhe aage aage hai mire dil ke chaTaḳhne kī sadā aur mirī gard-e-anā hai mire pīchhe pīchhe zindagī thak ke kisī moḌ pe ruktī hī nahīñ kab se ye ābla-pā hai mire pīchhe pīchhe apnā saaya to maiñ dariyā meñ bahā aayā thā kaun phir bhaag rahā hai mire pīchhe pīchhe paañv par paañv ko rakhtā hai chalā aatā hai mirā naqsh-e-kaf-e-pā hai mire pīchhe pīchhe merī tanhā.ī se Takrā ke palaT jā.egī ye jo ḳhushbu-e-qabā hai mire pīchhe pīchhe maiñ to dauḌā huuñ ḳhud apne hī ta.āqub meñ 'farīd' chāñd kyuuñ bhaag paḌā hai mire pīchhe pīchhe"

"sar-ba-sar pyaas meñ Duubā nazar aatā hai mujhe jis jagah bhī koī dariyā nazar aatā hai mujhe jām-e-jam se bhī sivā hai ye mirā jām-e-sifāl kyā kahūñ is meñ bhī kyā kyā nazar aatā hai mujhe kyā banegā mirī āñkhoñ kā mire shīshagaro jo yahāñ jaisā hai vaisā nazar aatā hai mujhe koī dekhe to dikhā.ūñ use manzar kā ma.aal koī pūchhe to kahūñ kyā nazar aatā hai mujhe kabhī hotā thā jo 'ġhālib' ke muqābil shab-o-roz rāt-din ab vo tamāshā nazar aatā hai mujhe"

"asr-e-āshūr se is arsa-e-shab tak ab tak istiġhāse kī sadā aatī hai sab tak ab tak dar se duurī kā sabab kuchh bhī ho par shahr ke biich log pahuñche hī nahīñ rahmat-e-rab tak ab tak ahl-e-īmāñ pe huī jin kī mohabbat vājib ham nahīñ siikh sake un kā adab tak ab tak chaudah sau saal meñ da.avā to bahut-soñ ne kiyā koī pahuñchā nahīñ ik mard-e-ajab tak ab tak ham ne un ko bhī sanad ibn-e-sanad maan liyā jin kā ma.alūm nahīñ nām-o-nasab tak ab tak koī labbaik kahe yā na kahe par 'ahmad' istiġhāse kī sadā aatī hai sab tak ab tak"

"ab ke vahshat meñ koī raah nikālūñgā maiñ ḳhud dasht vo de vahāñ dīvār banā lūñgā maiñ ḳhud kyoñ koī mere parindoñ kī nigah-dārī kare zaḳhm ḳhud paale haiñ to in ko sañbhālūñgā maiñ ḳhud aap bas mujh ko mirā chaak ināyat kar deñ apnī miTTī se koī shakl banā lūñgā maiñ ḳhud mere ġhāsib se kaho merā ḳharāba mujhe de ban paḌā mujh se to ye shahr basā lūñgā maiñ ḳhud mere dushman se kaho āb-e-baqā hai to pilā.e zahr kā kyā hai kisī roz ye khā lūñgā maiñ ḳhud tujh se miltā koī mil jaa.e to ai jān-e-tilism hū-bahū us ko tire jaisā banā lūñgā maiñ ḳhud abr mushkil hai to chal sāya-e-dīvār hī de jab chalūñgā to use saath chalā lūñgā maiñ ḳhud log kahte haiñ mire harf-e-duā meñ hai asar vāqa.ī hai to kabhī apnī duā lūñgā maiñ ḳhud merī ustād hai ḳhud merī jibillat 'ahmad' jaisī miTTī ho qadam apne jamā lūñgā maiñ ḳhud"

"jab se ik chāñd kī chāhat meñ sitārā huā huuñ shahr-e-shab-zād kī āñkhoñ kā sahārā huā huuñ ai mire dard ke dariyā kī ravānī mujhe dekh maiñ tire qurb se kaT kaT ke kināra huā huuñ zindagī! tujh sā munāfiq bhī koī kyā hogā terā shahkār huuñ aur terā hī maarā huā huuñ bujh ga.e jab mire sab ḳhvāb o charāġh o mahtāb shahr-e-zulmat ko maiñ tab jā ke gavārā huā huuñ sāmne phir mire apne haiñ so maiñ jāntā huuñ jiit bhī jā.ūñ to ye jañg maiñ haarā huā huuñ zaḳhm gintā huuñ shab-e-hijr meñ aur sochtā huuñ maiñ to apnā bhī na thā kaise tumhārā huā huuñ maiñ payambar huuñ na ho saktā huuñ phir bhī 'ahmad' aisā lagtā hai sar-e-ḳhāk utārā huā huuñ"

"zindagī tere liye raushnī laate hue log jal-bujhe ātish-e-idrāk churāte hue log uTh ke dekhā to maiñ ḳhud bhī vahāñ maujūd na thā le ga.e mujh ko mire ḳhvāb se jaate hue log dard kī gard meñ āñkheñ bhī gañvā baiThe haiñ ai ġham-e-dil tirī tasvīr banāte hue log un ke bachche bhī inhī galiyoñ meñ rahte haiñ to phir sochte kyoñ nahīñ shahroñ ko jalāte hue log apne khetoñ meñ agar aag hī boī hai to phir raakh ho jā.eñge ye fasl uThāte hue log"

"din se bichhḌī huī bārāt liye phirtī hai chāñd tāroñ ko kahāñ raat liye phirtī hai ye kahīñ us ke mazālim kā mudāvā hī na ho ye jo pattoñ ko havā saath liye phirtī hai chalte chalte hī sahī baat to kar lī jaa.e ham ko duniyā meñ yahī baat liye phirtī hai lamha lamha tirī furqat meñ pighaltī huī umr garmi-e-shauq-e-mulāqāt liye phirtī hai varna ham shahr-e-gul-āzār meñ kab aate the ye to ham ko bharī-barsāt liye phirtī hai jis taraf se maiñ guzartā bhī nahīñ thā pahle ab vahīñ gardish-e-hālāt liye phirtī hai"

"jab se ik chāñd kī chāhat meñ sitārā huā huuñ shahr-e-shab-zād kī āñkhoñ ko sahārā huā huuñ ai mire dard ke dariyā kī ravānī mujhe dekh maiñ tire qurb se kaT-kaT ke kinārā huā huuñ bujh ga.e jab mire sab ḳhvāb-o-charāg-o-māhtāb shahr-e-zulmat ko maiñ tab jā ke gavārā huā huuñ zindagī tujh sā munāfiq bhī koī kyā hogā tirā shahkār huuñ aur terā hī maarā huā huuñ zaḳhm gintā huuñ shab-e-hijr meñ aur sochtā huuñ maiñ to apnā bhī na thā kaise tumhārā huā huuñ sāmne phir mire apne haiñ so maiñ jāntā huuñ jiit bhī jā.ūñ to ye jang maiñ haarā huā huuñ maiñ payambar huuñ na ho saktā huuñ phir bhī 'ahmad' aisā lagtā hai sar-e-ḳhāk utārā huā huuñ"

"ism paḌhā aur jism se uTh kar ishq uThāyā dil darvesh ne mast qalandar ishq uThāyā farsh pe arsh ke baad mukarrar ishq uThāyā ruuh ne ab ke jism ke andar ishq uThāyā shā.ir suufī falsafa-dān valī paiġhambar sab ne apne zarf barābar ishq uThāyā niiñd se jaage sar par duniyā-dārī Dhoī aañkh lagī aur ḳhvāb ke andar ishq uThāyā us ko ishq ḳhud aap uThā kar le gayā aage jis ne himmat kī aur baḌh kar ishq uThāyā sachchā jhūTā ḳhaam haqīqī aur majāzī lekin ham ne sab se behtar ishq uThāyā jis din sab apne hāthoñ meñ naame laa.e ham ne to us din bhī sar par ishq uThāyā hazrat-e-qais ne ḳhud aa kar gaThḌī uThvā.ī maiñ ne jab apne kāñdhoñ par ishq uThāyā ek badan do jism huā thā jis ḳhvāhish par us ḳhvāhish ne paikar paikar ishq uThāyā ye dīvāngī dīvane-pan se nahīñ aa.ī ham ne 'ahmad' soch-samajh kar ishq uThāyā"

zaḳhm gintā huuñ shab-e-hijr meñ aur sochtā huuñ
maiñ to apnā bhī na thā kaise tumhārā huā huuñ

sāmne phir mire apne haiñ so maiñ jāntā huuñ
jiit bhī jā.ūñ to ye jañg maiñ haarā huā huuñ

apnā saaya to maiñ dariyā meñ bahā aayā thā
kaun phir bhaag rahā hai mire pīchhe pīchhe