apnā saaya to maiñ dariyā meñ bahā aayā thā — Shayari Of Ahmad Fareed

sab pe khulne kī hameñ hī aarzū shāyad na thī
ek do hoñge ki ham jin par faqīrāna khule

zindagī! tujh sā munāfiq bhī koī kyā hogā
terā shahkār huuñ aur terā hī maarā huā huuñ

zaḳhm gintā huuñ shab-e-hijr meñ aur sochtā huuñ
maiñ to apnā bhī na thā kaise tumhārā huā huuñ

sāmne phir mire apne haiñ so maiñ jāntā huuñ
jiit bhī jā.ūñ to ye jañg maiñ haarā huā huuñ

qatra apnā bhī haqīqat meñ hai dariyā lekin
ham ko taqlīd-e-tunuk-zarfi-e-mansūr nahīñ

ishrat-e-qatra hai dariyā meñ fanā ho jaanā
dard kā had se guzarnā hai davā ho jaanā

hai kā.enāt ko harakat tere zauq se
partav se āftāb ke zarre meñ jaan hai

hue madfūn-e-dariyā zer-e-dariyā tairne vaale
tamāñche mauj ke khāte the jo ban kar guhar nikle

kaifiyat hī koī paanī ne badal lī ho kahīñ
ham jise dasht samajhte haiñ vo dariyā hī na ho

raqs karne kā milā hukm jo dariyāoñ meñ
ham ne ḳhush ho ke bhañvar bāñdh liyā paañv meñ