Fitrat

qatra apnā bhī haqīqat meñ hai dariyā lekin
ham ko taqlīd-e-tunuk-zarfi-e-mansūr nahīñ

hue madfūn-e-dariyā zer-e-dariyā tairne vaale
tamāñche mauj ke khāte the jo ban kar guhar nikle

ishrat-e-qatra hai dariyā meñ fanā ho jaanā
dard kā had se guzarnā hai davā ho jaanā

hai kā.enāt ko harakat tere zauq se
partav se āftāb ke zarre meñ jaan hai

kaifiyat hī koī paanī ne badal lī ho kahīñ
ham jise dasht samajhte haiñ vo dariyā hī na ho

raqs karne kā milā hukm jo dariyāoñ meñ
ham ne ḳhush ho ke bhañvar bāñdh liyā paañv meñ

amal se zindagī bantī hai jannat bhī jahannam bhī
ye ḳhākī apnī fitrat meñ na nuurī hai na naarī hai

mirī is chashm-e-tar se abr-e-bārāñ ko hai kyā nisbat
ki vo dariyā kā paanī aur ye ḳhūn-e-dil hai barsātī

mirī fazā meñ hai tartīb-e-kā.enāt kuchh aur
ajab nahīñ jo tirā chāñd hai sitāra mujhe

yahīñ tak laa.ī hai ye zindagī bhar kī masāfat
lab-e-dariyā huuñ maiñ aur vo pas-e-dariyā khilā hai

yahī zamāna-e-hāzir kī kā.enāt hai kyā
dimāġh raushan o dil tiira o nigah bebāk

ye kā.enāt abhī nā-tamām hai shāyad
ki aa rahī hai damādam sadā-e-kun-fayakūñ

qatra dariyā meñ jo mil jaa.e to dariyā ho jaa.e
kaam achchhā hai vo jis kā ki ma.aal achchhā hai

ye javāhir-ḳhāna-e-duniyā jo hai bā-āb-o-tāb
ahl-e-sūrat kā hai dariyā ahl-e-ma.anī kā sarāb

tirā chaḌhā huā dariyā samajh meñ aatā hai
tire ḳhamosh kināre nahīñ samajhtā huuñ

fitrat ko ḳhirad ke rū-ba-rū kar
tasḳhīr-e-maqām-e-rañg-o-bū kar

nahīñ terā nasheman qasr-e-sultānī ke gumbad par
tū shāhīñ hai baserā kar pahāḌoñ kī chaTānoñ meñ

vajūd-e-zan se hai tasvīr-e-kā.enāt meñ rañg
isī ke saaz se hai zindagī kā soz-e-darūñ

tū ne ye kyā ġhazab kiyā mujh ko bhī faash kar diyā
maiñ hī to ek raaz thā sīna-e-kā.enāt meñ

vo aa.e ghar meñ hamāre ḳhudā kī qudrat hai
kabhī ham un ko kabhī apne ghar ko dekhte haiñ