Hatim Ali Mehr

raton ko but baghal men hain qur.an tamam din
hindu tamam shab huun musalman tamam din

aap hi par nahin divana-pan apna mauquf
aur bhi chand pari-zad hain achchhe achchhe

miri to khaak bhi tere qadam na chhoDegi
zara tu aane to de apne pa.emal ka vaqt

chhu jaa.e jo bande ke siva jism se tere
allah kare haath vo gal jaa.e to achchha

kis par nahin rahi hai inayat huzur ki
sahab nahin mujhi pe tumhara karam faqat

namaz-e-sub.h vo hi paDh rahe the ka.abe men
janab-e-'mehr' jo mandir men the pujari raat

ai buton allaah se li hai ijaazat vasl ki
kal hazaaron dekh Daale istikhaare raat ko

hai ye purab ki zabaan-daani 'mehr'
kahte hain baat ko ham suntaa huun

kaabe mein ham ko dair kaa har dam khayaal thaa
allaah jaantaa hai buton kaa rahaa lihaaz

dar-ba-dar maaraa-phiraa main justuju-e-yaar mein
zaahid-e-kaaba huaa rahbaan-e-but-khaana huaa

ye hind hai ai 'mehr' yahaan puuj buton ko
kyuun barahman-e-dair-o-kalisaa nahin honaa

gul baang thi gulon ki hamaaraa taraana thaa
apnaa bhi is chaman mein kabhi aashiyaana thaa