Meer Mehdi Majrooh

chura ke muTThi men dil ko chhupa.e baiThe hain
bahana ye hai ki mehndi laga.e baiThe hain

kuchh arz-e-tamanna men shikva na sitam ka tha
main ne to kaha kya tha aur aap ne kya jaana

jaan insan ki lene valon men
ek hai maut dusra hai ishq

kya hamari namaz kya roza
bakhsh dene ke sau bahane hain

ghairon ko bhala samjhe aur mujh ko bura jaana
samjhe bhi to kya samjhe jaana bhi to kya jaana

aa hi kuuda tha dair men vaa.iz
ham ne Taala khuda khuda kar ke

kisi se ishq apnaa kyaa chhupaaein
mohabbat Tapki paDti hai nazar se

kyuun paas mire aa kar yuun baiThe ho munh phere
kyaa lab tire misri hain main jin ko chabaa jaataa

apni kashti kaa hai khudaa haafiz
pichhe tufaan hai saamne girdaab

shaghl-e-ulfat ko jo ahbaab buraa kahte hain
kuchh samajh mein nahin aataa ki ye kyaa kahte hain

ye kyaa ki hamin marte rahein lutf to jab hai
taasir-e-mohabbat jo idhar ho to udhar bhi

sahal ho garche adu ko magar us kaa milnaa
itnaa main khuub samajhtaa huun ki aasaan to nahin