Rais Farogh

mera bhi ek baap tha achchha sa ek baap
vo jis jagah pahunch ke mara tha vahin huun main

main ne kitne raste badle lekin har raste men 'farogh'
ek andhera saath raha hai raushniyon ke hujum liye

dhuup musafir chhanv musafir aa.e koi koi jaa.e
ghar men baiTha soch raha huun angan hai ya rasta hai

lakhon hi baar bujh ke jala dard ka diya
so ek baar aur bujha phir jala nahin

log nazuk the aur ehsas ke virane tak
vo guzarte hue ankhon ki jalan se aa.e

husn ko husn banane men mira haath bhi hai
aap mujh ko nazar-andaz nahin kar sakte

fasl tumhaari achchhi hogi jaao hamaare kahne se
apne gaanv ki har gori ko nai chunariyaa laa denaa

bastiyon mein ham bhi rahte hain magar
jaise aavaara havaa sahraaon mein

ham koi achchhe chor nahin par ek dafa to ham ne bhi
saaraa gahna luuT liyaa thaa aadhi raat ke mehmaan kaa

tez havaa ke saath chalaa hai zard musaafir mausam kaa
os ne daaman thaam liyaa to pal-do-pal ko rukaa bhi hai

mere aangan ki udaasi na gai
roz mehmaan bulaae main ne

ThanDi chaae ki pyaali pi ke
raat ki pyaas bujhaai hai