ThanDi chaae ki pyaali pi ke — Rais Farogh

bastiyon mein ham bhi rahte hain magar
jaise aavaara havaa sahraaon mein

ham koi achchhe chor nahin par ek dafa to ham ne bhi
saaraa gahna luuT liyaa thaa aadhi raat ke mehmaan kaa

tez havaa ke saath chalaa hai zard musaafir mausam kaa
os ne daaman thaam liyaa to pal-do-pal ko rukaa bhi hai

mere aangan ki udaasi na gai
roz mehmaan bulaae main ne

meraa bhi ek baap thaa achchhaa saa ek baap
vo jis jagah pahunch ke maraa thaa vahin huun main

fasl tumhaari achchhi hogi jaao hamaare kahne se
apne gaanv ki har gori ko nai chunariyaa laa denaa

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

shor din ko nahin sone detaa
shab ko sannaaTaa jagaa detaa hai

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

andheri raat ki parchhaaiyon mein Duub gayaa
sahar ki khoj mein jo bhi ufuq ke paar gayaa

chaandni ke haath bhi jab ho gae shal raat ko
apne siine par sambhaalaa main ne bojhal raat ko