ham jis ke ho gae vo hamaaraa na ho sakaa — Aale Ahmad Suroor

ab dhanak ke rang bhi un ko bhale lagte nahin
mast saare shahr vaale khuun ki holi mein the

— Aale Ahmad Suroor

husn kaafir thaa adaa qaatil thi baatein sehr thiin
aur to sab kuchh thaa lekin rasm-e-dildaari na thi

— Aale Ahmad Suroor

saahil ke sukun se kise inkaar hai lekin
tufaan se laDne mein mazaa aur hi kuchh hai

— Aale Ahmad Suroor

tumhaari maslahat achchhi ki apnaa ye junun behtar
sambhal kar girne vaalo ham to gir gir kar sambhle hain

— Aale Ahmad Suroor

jahaan mein ho gai naa-haq tiri jafaa badnaam
kuchh ahl-e-shauq ko daar-o-rasan se pyaar bhi hai

— Aale Ahmad Suroor

bastiyaan kuchh huiin viraan to maatam kaisaa
kuchh kharaabe bhi to aabaad huaa karte hain

— Aale Ahmad Suroor

pyaaso raho na dasht mein baarish ke muntazir
maaro zamin pe paanv ki paani nikal paDe

— Iqbal Sajid

sabza o gul kahaan se aae hain
abr kyaa chiiz hai havaa kyaa hai

— Mirza Ghalib

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai

— Zafar Iqbal

sach ishq mein hain aashiq o maashuq baraabar
jo mushkil-e-majnun hai so hai mushkil-e-lailaa

— Mushafi Ghulam Hamdani

chaand ne taan li hai chaadar-e-abr
ab vo kapDe badal rahi hogi

— Jaun Elia

us ko sochun to dhyaan mein mere
khushbu aati hai pahli baarish ki

— Vibha Jain 'Khwaab'