vo khat vo chehra vo zulf-e-siyaah to dekho — Aasi Ghazipuri

subh tak vo bhi na chhoDi tu ne ai baad-e-sabaa
yaadgaar-e-raunaq-e-mahfil thi parvaane ki khaak

— Aasi Ghazipuri

itnaa to jaante hain ki aashiq fanaa huaa
aur us se aage baDh ke khudaa jaane kyaa huaa

— Aasi Ghazipuri

vo yahaan tak jo aa nahin sakte
kyaa mujhe bhi bulaa nahin sakte

— Aasi Ghazipuri

lab-e-naazuk ke bose luun to missi munh banaati hai
kaf-e-paa ko agar chumun to mehndi rang laati hai

— Aasi Ghazipuri

bimaar-e-gham ki chaaragari kuchh zarur hai
vo dard dil mein de ki masihaa kahein jise

— Aasi Ghazipuri

kis ko dekhaa un ki surat dekh kar
ji mein aataa hai ki sajda kijiye

— Aasi Ghazipuri

har subh nikalte hain yahi soch ke ghar se
bikhri hui duniyaa ko sameTeinge kisi din

— Sayyed Riyaz Raheem

aankhon mein meri subh-e-qayaamat gai jhamak
siine se us pari ke jo parda ulaT gayaa

— Nazeer Akbar Abadi

haan dikhaa de ai tasavvur phir vo subh o shaam tu
dauD pichhe ki taraf ai gardish-e-ayyaam tu

— Allama Iqbal

shab-e-vaada fasil-e-hijr se aage chamaktaa hai tiraa ism-e-sitaara-ju
ki jaise koi paivand-e-ridaa-e-subh aa jaae kisi qindil ki zad mein

— Zahid Masood

andheri shab kaa ye khvaab-manzar mujhe ujaalon se bhar rahaa hai
to raat itni tavil kar de ki taa-qayaamat sahar na aae

— Aleena Itrat

raushni tez karo chaand sitaaro apni
mujh ko manzil pe pahunchnaa hai sahar hone tak

— Heera Lal Falak Dehlvi