aadhe peD pe sabz parinde aadhaa peD aasebi hai — Ali Akbar Natiq

hijaab aa gayaa thaa mujh ko dil ke iztiraab par
yahi sabab hai tere dar pe lauT kar na aa sakaa

itnaa aasaan nahin paani se shabihein dhonaa
khud bhi roegaa musavvir ye qayaamat kar ke

sard raaton ki havaa mein uDte patton ke masil
kaun tere shab-navardon ko sambhaale shahr mein

ghubaar-e-shahr mein use na DhunD jo khizaan ki shab
havaa ki raah se milaa, havaa ki raah par gayaa

mukhtasar baat thii, phaili kyuun sabaa ki maanind
dard-mandon kaa fasaana thaa, uchhaalaa kis ne

koi na rasta naap sakaa hai, ret pe chalne vaalon kaa
agle qadam par miT jaaegaa pahlaa naqsh hamaaraa bhi