roz zindaan ki divaar pe likhtaa hai koi — Azhar Sajjad

apne me'yaar se niche main bhalaa kyon aauun
tum jise zo'm samajhte ho vo khuddaari hai

— Azhar Sajjad

phir mulaaqaat kaa tufaan uThaa hai dil mein
phir se ik baar bichhaD jaane ki tayyaari hai

— Azhar Sajjad

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

ye aansu ponchh lijiye aur muskuraaiye
chaara nahin hai koi bhi rukhsat kiye baghair

— Nasim Zahid

jab ki pahlu se yaar uThtaa hai
dard be-ikhtiyaar uThtaa hai

— Mir Taqi Mir

husn jalva dikhaa gayaa apnaa
ishq baiThaa rahaa udaas kahin

— Saifuddin Saif

main ne apni palkon par gham-kade sajaae hain
aarzu ke maatam mein sogvaar hasti hai

— Hanif Fauq

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

— Nazeer Akbar Abadi