husn jalva dikhaa gayaa apnaa — Saifuddin Saif

'saif' andaaz-e-bayaan rang badal detaa hai
varna duniyaa mein koi baat nai baat nahin

shor din ko nahin sone detaa
shab ko sannaaTaa jagaa detaa hai

aaj ki raat vo aae hain baDi der ke baad
aaj ki raat baDi der ke baa'd aai hai

paas aae to aur ho gae duur
ye kitne ajiib faasle hain

gham-gusaaro bahut udaas huun main
aaj bahlaa sako to aa jaao

us musaafir ki naqaahat kaa Thikaana kyaa hai
sang-e-manzil jise divaar nazar aane lage

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

vo dard huun koi chaara nahin hai jis kaa kahin
vo zakhm huun ki hai dushvaar indimaal miraa

nur-e-sahar kahaan hai agar shaam-e-gham gai
kab iltifaat thaa ki jo khu-e-sitam gai

mire aibon ko ginvaayaa to sab ne
kisi ne meri gham-khvaari nahin ki

hamaare she'r naghme aur sajde
adaa jo ho na paae kyaa hue vo