mere surkh lahu se chamki kitne haathon mein mehndi — Bahadur Shah Zafar

ab ki jo raah-e-mohabbat mein uThaai taklif
sakht hoti hamein manzil kabhi aisi to na thi

— Bahadur Shah Zafar

kitnaa hai bad-nasib 'zafar' dafn ke liye
do gaz zamin bhi na mili ku-e-yaar mein

— Bahadur Shah Zafar

dekh dil ko mire o kaafir-e-be-pir na toD
ghar hai allaah kaa ye is ki to taamir na toD

— Bahadur Shah Zafar

kyaa taab kyaa majaal hamaari ki bosa lein
lab ko tumhaare lab se milaa kar kahe baghair

— Bahadur Shah Zafar

khvaab meraa hai ain bedaari
main to us mein bhi dekhtaa kuchh huun

— Bahadur Shah Zafar

bulbul ko baaghbaan se na sayyaad se gila
qismat mein qaid likkhi thi fasl-e-bahaar mein

— Bahadur Shah Zafar

roza-daaraan-e-judaai kuun kham-e-abru-e-yaar
maah-e-id-e-ramazaan thaa mujhe maalum na thaa

— Siraj Aurangabadi

iid par masrur hain donon miyaan biivi bahut
ik kharidaari se pahle ik kharidaari ke baad

— Sarfaraz Shahid

muddaton baa'd kabhi ai nazar aane vaale
iid kaa chaand na dekhaa tiri surat dekhi

— Manzar Lakhnavi

kahin hai iid ki shaadi kahin maatam hai maqtal mein
koi qaatil se miltaa hai koi bismil se miltaa hai

— Dagh Dehlvi

yaarab hazaar saal salaamat rahein huzur
ho roz jashn-e-id yahaan jaavedaan basant

— Muneer Shikohabadi

iid hai qatl miraa ahl-e-tamaashaa ke liye
sab gale milne lage jab ki vo jallaad aayaa

— Dagh Dehlvi