Eid

roza-dārān-e-judā.ī kuuñ ḳham-e-abrū-e-yār
māh-e-īd-e-ramazāñ thā mujhe ma.alūm na thā

ishrat-e-qatl-gah-e-ahl-e-tamannā mat pūchh
īd-e-nazzāra hai shamshīr kā uryāñ honā

jahāñ se tohfatan bhejī ga.ī thī iid ke din se
vahīñ phirtī-phirātī aa ga.ī hai raan bakre kī

rahmat agar qubūl kare kyā ba.iid hai
sharmindagī se uzr na karnā gunāh kā

tujh ko merī na mujhe terī ḳhabar jā.egī
eid ab ke bhī dabe paañv guzar jā.egī

aaj yāroñ ko mubārak ho ki sub.h-e-eid hai
raag hai mai hai chaman hai dilrubā hai diid hai

furāt-e-chashm pe hai karbalā kī tuġhyānī
darūn-e-kūfa-e-dil iid karne aayā huuñ

hālāt 'shahāb' aañkh uThāne nahīñ dete
bachchoñ ko magar iid manāne kī paḌī hai

is Dar se rok rakkhe haiñ aañsū 'sa.īd' ne
āñchal na bhiig jaa.e kisī gul-jabīn kā

va.ada-e-vasl diyā iid kī shab ham ko sanam
aur tum jā ke hue shīr-o-shakar aur kahīñ

mah-jabīñ iid meñ añgusht-numā kyuuñ na raheñ
iid kā chāñd hī añgusht-numā hotā hai

us but ko chhoḌ kar haram-o-dair par miTe
aql-e-sharīf se ye nihāyat ba.iid hai

rasman gale to milte haiñ ham 'iid par zarūr
lekin diloñ ke fāsle hote nahīñ haiñ duur

ek ne.amat tire mahjūr ke haath aa.ī hai
iid kā chāñd charāġh-e-shab-e-tanhā.ī hai

ġham ke pīchho raast kahte haiñ ki shādī hove hai
hazrat-e-ramzāñ ga.e tashrīf le ab iid hai

shahr ḳhālī hai kise eid mubārak kahiye
chal diye chhoḌ ke makka bhī madīna vaale

itne meñ aur charḳh ne miTTī palīd kī
bachche ne muskurā ke ḳhabar dī jo iid kī

mīlād-e-shah kā din hai ki ye roz-e-īd hai
ik bāda-ḳhvār kā sā sabā meñ ḳhumār hai

jab aayā iid kā din ghar meñ bebasī kī tarah
to mere phuul se bachchoñ ne mujh ko gher liyā

hāsil us mah-laqā kī diid nahīñ
eid hai aur ham ko eid nahīñ