muddaton baa'd kabhi ai nazar aane vaale — Manzar Lakhnavi

ahl-e-mahshar dekh luun qaatil ko to pahchaan luun
bholi-bhaali shakl thi aur kuchh bhalaa saa naam thaa

hain sau tariqe aur bhi ai be-qaraar dil
izhaar-e-shikva shikve ke andaaz mein na ho

in se jab puchhaa gayaa bismil tumhaare kyaa karein
hans ke bole zakhm-e-dil dekhaa karein royaa karein

kam-sini kyaa kam thi is par qahr hai shakki mizaaj
apnaa naavak mere dil se khinch kar dekhaa kiye

kisi aankh mein niind aae to jaanun
miraa qissa-e-gham kahaani nahin hai

vo to kahiye aap ki ulfat mein dil bahlaa rahaa
varna duniyaa chaar din bhi rahne ke qaabil na thi

vo chaand hai to aks bhi paani mein aaegaa
kirdaar khud ubhar ke kahaani mein aaegaa

aate rahte hain falak se bhi ishaare kuchh na kuchh
baat kar lete hain ham se chaand taare kuchh na kuchh

jab adhure chaand ki parchhaain paani par paDi
raushni ik naa-mukammal si kahaani par paDi

shaamil na hote husn ke jalve agar 'kamaal'
hotaa kahaan ye nuur shab-e-maahtaab mein

baat vo aadhi raat ki raat vo puure chaand ki
chaand bhi ain chait kaa us pe tiraa jamaal bhi

ik divaar pe chaand Tikaa thaa
main ye samjhaa tum baiThe ho