zaahiri vaaz se hai kyaa haasil — Bahram Ji

nahin but-khaana o kaaba pe mauquf
huaa har ek patthar mein sharar band

hai musalmaan ko hamesha aab-e-zamzam ki talaash
aur har ik barhaman gang-o-jaman mein mast hai

nahin duniyaa mein aazaadi kisi ko
hai din mein shams aur shab ko qamar band

pataa miltaa nahin us be-nishaan kaa
liye phirtaa hai qaasid jaa-ba-jaa khat

zaahidaa kaabe ko jaataa hai to kar yaad-e-khudaa
phir jahaazon mein khayaal-e-naa-khudaa kartaa hai kyuun

DhunDh kar dil mein nikaalaa tujh ko yaar
tu ne ab mehnat miri be-kaar ki