DhunDh kar dil mein nikaalaa tujh ko yaar — Bahram Ji

nahin but-khaana o kaaba pe mauquf
huaa har ek patthar mein sharar band

hai musalmaan ko hamesha aab-e-zamzam ki talaash
aur har ik barhaman gang-o-jaman mein mast hai

nahin duniyaa mein aazaadi kisi ko
hai din mein shams aur shab ko qamar band

pataa miltaa nahin us be-nishaan kaa
liye phirtaa hai qaasid jaa-ba-jaa khat

zaahidaa kaabe ko jaataa hai to kar yaad-e-khudaa
phir jahaazon mein khayaal-e-naa-khudaa kartaa hai kyuun

zaahiri vaaz se hai kyaa haasil
apne baatin ko saaf kar vaaiz

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

kaabe ko jaataa kis liye hindostaan se main
kis but mein shahr-e-hind ke shaan-e-khudaa na thi

jab ki pahlu se yaar uThtaa hai
dard be-ikhtiyaar uThtaa hai

baat karnaa pyaar ki aasaan se aasaan hai
ishq karnaa karte rahnaa hai kaThin se bhi kaThin

dekhe na mujhe kyunkar az-chashm-e-hiqaarat-u
vo sarv-e-javaan yaaro man-faakhta-e-piram

yaad aai hai to phir TuuT ke yaad aai hai
koi guzri hui manzil koi bhuli hui dost