huaa karbalaa mein jo qurbaan 'barqi' — Barqi Azmi

samajh rahaa thaa jise khair-khvaah main apnaa
vahi hai dushman-e-jaan meraa sab se baDh kar aaj

ruThne aur manaane ke ehsaas mein hai ik kaif-o-surur
main ne hamesha use manaayaa vo bhi mujhe manaae to

is haal mein kab tak yunhi ghuT ghuT ke jiyungaa
ruThaa hai vo aise ki manaa bhi nahin saktaa

chappa chappa us ki gali kaa rahaa hai mere zer-e-qadam
josh-e-junun se azm-e-safar tak ek kahaani biich mein hai

ab main huun aur khvaab-e-pareshaan hai mere saath
kitnaa paDegaa aur abhi jaagnaa mujhe

ajab khun-chakaan karbalaa kaa samaan thaa
the sab tishna-lab aur dariyaa ravaan thaa