tum use le chalo lab-e-kausar — Farhat Abbas

zalzalon ki numud se 'farhat'
mustaqar mustaqar nahin rahte

donon laazim hain laa-zavaal bhi hain
ik tiraa husn ik miraa ye ishq

tere saanche mein Dhal gayaa aakhir
shahr saaraa badal gayaa aakhir

jise bhi dost banaayaa vo ban gayaa dushman
ye ham ne kaun si taqsir ki sazaa paai

haar jaaegi zindagi lekin
haarne kaa nahin miraa ye ishq

baat ahl-e-junun ki kyaa samjhe
vo khirad jo kaDe ziyaan mein hai