kami kuchh apne hi zauq-e-talab mein hai varna — Haneef Najmi

mili na ham ko shahaadat to kyaa ye kyaa kam hai
ki saari 'umr rah-e-karbalaa pe chalte rahe

— Haneef Najmi

tire gham ne 'ataa ki hai 'ajab paakizgi mujh ko
main rotaa huun to aankhon se miri zamzam nikaltaa hai

— Haneef Najmi

hai dida-var to ek nazar mein parakh mujhe
laazim nahin kisi ko kai baar dekhnaa

— Haneef Najmi

bhalaa vo khaak samjheinge khudaa kyaa hai khudi kyaa hai
jo ab tak ye nahin samjhe maqaam-e-aadmi kyaa hai

— Haneef Najmi

bisaat-e-khaak par behad qad-aavar lag rahe the jo
bulandi par pahunch kar vo bahut chhoTe nazar aae

— Haneef Najmi

shaa'iri kyaa hai miri jaan tujhe maa'lum nahin
ek tohmat hai jo mujh par bhi lagaa di gai hai

— Haneef Najmi

kaho kyaa mehrbaan naa-mehrbaan taqdir hoti hai
kahaa maan ki duaaon mein baDi taasir hoti hai

— Anjum Khaleeq

nahin vo sham-e-mohabbat rahi to phir 'aasim'
ye kis duaa se mire ghar mein raushni si hai

— Asim Wasti

abr barse to inaayat us ki
shaakh to sirf duaa karti hai

— Parveen Shakir

sikhaa na duaaon mein qanaaat kaa saliqa
vo maang rahaa huun jo muqaddar mein nahin hai

— Asim Wasti

is taraf bhi kabhi aanaa ki asiraan-e-qafas
ai nasim-e-sahari tujh ko duaa dete hain

— Mushafi Ghulam Hamdani

gar khaak se hamaari putlaa koi banaave
teri duaa mein us ki uTThi kalaaiyaan hon

— Mushafi Ghulam Hamdani