Dua

jo zahr pī chukā huuñ tumhīñ ne mujhe diyā
ab tum to zindagī kī duā.eñ mujhe na do

ham se khul jaao ba-vaqt-e-mai-parastī ek din
varna ham chheḌeñge rakh kar uzr-e-mastī ek din

gar tujh ko hai yaqīn-e-ijābat duā na maañg
ya.anī baġhair-e-yak-dil-e-be-mudda.ā na maañg

gavāhī kaise TūTtī muāmla ḳhudā kā thā
mirā aur us kā rābta to haath aur duā kā thā

jo nafas thā ḳhār-e-gulū banā jo uThe the haath lahū hue
vo nashāt-e-āh-e-sahr ga.ī vo vaqār-e-dast-e-duā gayā

hatheliyoñ kī duā phuul ban ke aa.ī ho
kabhī to rang mire haath kā hinā.ī ho

maiñ ne junūñ se kī jo 'asad' iltimās-e-rañg
ḳhūn-e-jigar meñ ek hī ġhota diyā mujhe

abr barse to ināyat us kī
shāḳh to sirf duā kartī hai

maiñ kyā karūñ mire qātil na chāhne par bhī
tire liye mire dil se duā nikaltī hai

sohbat meñ ġhair kī na paḌī ho kahīñ ye ḳhū
dene lagā hai bosa baġhair iltijā kiye

merī talab thā ek shaḳhs vo jo nahīñ milā to phir
haath duā se yuuñ girā bhuul gayā savāl bhī

vo dil hī kyā tire milne kī jo duā na kare
maiñ tujh ko bhuul ke zinda rahūñ ḳhudā na kare

'riyāz' ehsās-e-ḳhuddārī pe kitnī choT lagtī hai
kisī ke paas jab jaatā hai koī mudda.ā le kar

maiñ bhī muñh meñ zabān rakhtā huuñ
kaash pūchho ki mudda.ā kyā hai

na luTtā din ko to kab raat ko yuuñ be-ḳhabar sotā
rahā khaTkā na chorī kā duā detā huuñ rahzan ko

jaan tum par nisār kartā huuñ
maiñ nahīñ jāntā duā kyā hai

āgahī dām-e-shunīdan jis qadar chāhe bichhā.e
mudda.ā anqā hai apne ālam-e-taqrīr kā

sarāpā aarzū hone ne banda kar diyā ham ko
vagarna ham ḳhudā the gar dil-e-be-mudda.ā hote

duā karo ki maiñ us ke liye duā ho jā.ūñ
vo ek shaḳhs jo dil ko duā sā lagtā hai

kuchh to rishta hai tum se kam-baḳhtoñ
kuchh nahīñ koī bad-duā bhejo