bhalaa vo khaak samjheinge khudaa kyaa hai khudi kyaa hai — Haneef Najmi

mili na ham ko shahaadat to kyaa ye kyaa kam hai
ki saari 'umr rah-e-karbalaa pe chalte rahe

tire gham ne 'ataa ki hai 'ajab paakizgi mujh ko
main rotaa huun to aankhon se miri zamzam nikaltaa hai

hai dida-var to ek nazar mein parakh mujhe
laazim nahin kisi ko kai baar dekhnaa

bisaat-e-khaak par behad qad-aavar lag rahe the jo
bulandi par pahunch kar vo bahut chhoTe nazar aae

ulajhnaa lafzon se sheva hai kam-nigaahon kaa
jo dida-var hain vo bainassutur dekhte hain

shaa'iri kyaa hai miri jaan tujhe maa'lum nahin
ek tohmat hai jo mujh par bhi lagaa di gai hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

kyon tasavvur mein ji rahaa huun main
jab haqiqat mein mar hi jaanaa hai

chup chup makaan raaste gum-sum niDhaal vaqt
is shahr ke liye koi divaanaa chaahiye

karnaa hai aap ko jo nae raaston ki khoj
sab jis taraf na jaaein udhar jaanaa chaahiye

na toDo dil ki hai kaaba kaa Dhaanaa
ye do ghar hain magar buniyaad hai ek

jahaan insaaniyat vahshat ke haathon zabh hoti ho
jahaan tazlil hai jiinaa vahaan behtar hai mar jaanaa