vo ek raat ki gardish mein itnaa haar gayaa — Haseeb Soz

tu ek saal mein ik saans bhi na ji paayaa
main ek sajde mein sadiyaan kai guzaar gayaa

— Haseeb Soz

ye bad-nasibi nahin hai to aur phir kyaa hai
safar akele kiyaa ham-safar ke hote hue

— Haseeb Soz

yahaan mazbut se mazbut lohaa TuuT jaataa hai
kai jhuTe ikaTThe hon to sachchaa TuuT jaataa hai

— Haseeb Soz

meri sanjida tabiat pe bhi shak hai sab ko
baaz logon ne to bimaar samajh rakkhaa hai

— Haseeb Soz

ye intiqaam hai yaa ehtijaaj hai kyaa hai
ye log dhuup mein kyuun hain shajar ke hote hue

— Haseeb Soz

tere mehmaan ke svaagat kaa koi phuul the ham
jo bhi niklaa hamein pairon se kuchal kar niklaa

— Haseeb Soz

jhaankte raat ke garebaan se
ham ne sau aaftaab dekhe hain

— Salman Akhtar

raushni ho rahi hai kuchh mahsus
kyaa shab aakhir tamaam ko pahunchi

— Aslam Farrukhi

shor din ko nahin sone detaa
shab ko sannaaTaa jagaa detaa hai

— Saifuddin Saif

dil mein na ho jurat to mohabbat nahin milti
khairaat mein itni baDi daulat nahin milti

— Nida Fazli

andheri shab kaa ye khvaab-manzar mujhe ujaalon se bhar rahaa hai
to raat itni tavil kar de ki taa-qayaamat sahar na aae

— Aleena Itrat

ghubaar-e-shahr mein use na DhunD jo khizaan ki shab
havaa ki raah se milaa, havaa ki raah par gayaa

— Ali Akbar Natiq