tu ik qadam bhi jo meri taraf baDhaa detaa — Kaifi Wijdani

sirf darvaaze talak jaa ke hi lauT aayaa huun
aisaa lagtaa hai ki sadiyon kaa safar kar aayaa

— Kaifi Wijdani

tamaam shahr jise chhoDne ko aaya hai
vo shakhs kitnaa akelaa safar pe niklegaa

— Kaifi Wijdani

ye khule khule se gesu inhein laakh tu sanvaare
mire haath se sanvarte to kuchh aur baat hoti

— Kaifi Wijdani

khud hi uchhaalun patthar khud hi sar par le luun
jab chaahun suune mausam se manzar le luun

— Kaifi Wijdani

bachaa liyaa tiri khushbu ke farq ne varna
main tere vahm mein tujh se lipaTne vaalaa thaa

— Kaifi Wijdani

basti mein gharibon ki jahaan aag lagi thi
sunte hain vahaan ek nayaa shahr basegaa

— Kaifi Wijdani

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

— Jafar Shirazi

yuun to maujud apne ghar mein hai
aadmi mustaqil safar mein hai

— Saleem Amrohvi

safar mein aise kai marhale bhi aate hain
har ek moD pe kuchh log chhuT jaate hain

— Aabid Adeeb

kin manzilon luTe hain mohabbat ke qaafile
insaan zamin pe aaj gharib-ul-vatan saa hai

— Ada Jafarey

yaad aai hai to phir TuuT ke yaad aai hai
koi guzri hui manzil koi bhuli hui dost

— Ahmad Faraz