kin manzilon luTe hain mohabbat ke qaafile — Ada Jafarey

bas ek baar manaayaa thaa jashn-e-mahrumi
phir us ke baad koi ibtilaa nahin aai

jis ki jaanib 'adaa' nazar na uThi
haal us kaa bhi mere haal saa thaa

hazaar kos nigaahon se dil ki manzil tak
koi qarib se dekhe to ham ko pahchaane

dil ke viraane mein ghume to bhaTak jaaoge
raunaq-e-kucha-o-baazaar se aage na baDho

kuchh itni raushni mein the chehron ke aaine
dil us ko DhunDhtaa thaa jise jaantaa na thaa

varna insaan mar gayaa hotaa
koi be-naam justuju hai abhi

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

be-zaar hain jo jazba-e-hubb-ul-vatani se
vo log kisi se bhi mohabbat nahin karte

kuchh badan ke the taqaaze kuchh sharaarat dil ki thi
aaj lekin ishq apnaa jaavedaan hone ko thaa

nae hain vasl ke mausam mohabbatein bhi nai
nae raqib hain ab ke adaavatein bhi nai

nafas ke loch ko khanjar banaanaa chaahti hai
mohabbat apni tezi aazmaanaa chaahti hai