safar mein aise kai marhale bhi aate hain — Aabid Adeeb

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

jinhein ye fikr nahin sar rahe rahe na rahe
vo sach hi kahte hain jab bolne pe aate hain

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

jahaan pahunch ke qadam Dagmagaae hain sab ke
usi maqaam se ab apnaa raastaa hogaa

amir-e-kaarvaan hai tang ham se
hamaaraa raastaa sab se alag hai

ham se 'aabid' apne rahbar ko shikaayat ye rahi
aankh munde un ke pichhe chalne vaale ham nahin

yuun to maujud apne ghar mein hai
aadmi mustaqil safar mein hai

yaar bhi raah ki divaar samajhte hain mujhe
main samajhtaa thaa mire yaar samajhte hain mujhe

barsaat kaa baadal to divaana hai kyaa jaane
kis raah se bachnaa hai kis chhat ko bhigonaa hai

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

kaTi hui hai zamin koh se samundar tak
milaa hai ghaao ye dariyaa ko raasta de kar

main ne anjaam se pahle na palaT kar dekhaa
duur tak saath mire manzil-e-aaghaaz gai