kamaane aur ganvaane mein bachaa paayaa huun bas itnaa — Lokesh Tripathi

vo zid karti hai lekin phir achaanak maan jaati hai
mire chehre ki rangat se vo qimat jaan jaati hai

— Lokesh Tripathi

chiiz koi nahin dusri chaahiye
baat jis ki hui thi vahi chaahiye

— Lokesh Tripathi

miraa hi man nahin lagtaa hai us mein
ki us kaa man bhi mujh se bhar gayaa hai

— Lokesh Tripathi

ye shaam Dhal rahi thi ki aai khabar buri
paani ke intizaar mein ik jhiil mar gai

— Lokesh Tripathi

ham se hamaare khvaab bhi jab duur ho gae
majbur tab hue yuun ki mazdur ho gae

— Lokesh Tripathi

ham sabhi aakaash mein laTke hue
sochte hain ki zamin pe paanv hai

— Lokesh Tripathi

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

— Ibn

jab ki pahlu se yaar uThtaa hai
dard be-ikhtiyaar uThtaa hai

— Mir Taqi Mir

kaabe ko jaataa kis liye hindostaan se main
kis but mein shahr-e-hind ke shaan-e-khudaa na thi

— Rind Lakhnavi

dekhe na mujhe kyunkar az-chashm-e-hiqaarat-u
vo sarv-e-javaan yaaro man-faakhta-e-piram

— Nazeer Akbar Abadi

baat karnaa pyaar ki aasaan se aasaan hai
ishq karnaa karte rahnaa hai kaThin se bhi kaThin

— Raghvendra Dwivedi

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

— Nida Fazli