muskuraa kar Daal di rukh par naqaab — Moin Ahsan Jazbi

tu aur gham-e-ulfat 'jazbi' mujh ko to yaqin aae na kabhi
jis qalb pe TuuTe hon patthar us qalb mein nashtar TuuT gae

na aae maut khudaayaa tabaah-haali mein
ye naam hogaa gham-e-rozgaar sah na sakaa

jab tujh ko tamannaa meri thi tab mujh ko tamannaa teri thi
ab tujh ko tamannaa ghair ki hai to teri tamannaa kaun kare

jab kabhi kisi gul par ik zaraa nikhaar aayaa
kam-nigaah ye samjhe mausam-e-bahaar aayaa

mile mujh ko gham se fursat to sunaaun vo fasaana
ki Tapak paDe nazar se mai-e-ishrat-e-shabaana

us ne is tarah mohabbat ki nigaahein Daalin
ham se duniyaa kaa koi raaz chhupaayaa na gayaa