bas lahu ki buund thi ehsaas mein — Riyaz Latif

kabhi to manzaron ke is tilism se ubhar sakun
khaDaa huun dil ki sath par khud apne intizaar mein

kisi ne ham ko ataa nahin ki hamaari gardish hai apni gardish
khud apni marzi se is jahaan ki ragon mein girdaab ham hue hain

khudaa ki khamoshi mein shaayad ho us kaa vajud
zamaana huaa naam apnaa pukaare hue

zamin phail gai hai hamaari ruuh talak
jahaan kaa shor ab andar sunaai detaa hai

yahin par khatm honi chaahiye thi ek duniyaa
yahin se baat kaa aaghaaz honaa chaahiye thaa

baad mein rakhe saraabon ke dayaaron mein qadam
pahle vo saans ki sarhad pe to aa kar dekhe