Khamoshi

fazā udaas hai rut muzmahil hai maiñ chup huuñ
jo ho sake to chalā aa kisī kī ḳhātir tū

raat yuuñ dil meñ tirī khoī huī yaad aa.ī
jaise vīrāne meñ chupke se bahār aa jaa.e

sāl-hā-sāl se ḳhāmosh the gahre paanī
ab nazar aa.e haiñ āvāz ke āsār mujhe

jā paḌe chup ho ke jab shahr-e-ḳhamoshāñ meñ 'nazīr'
ye ġhazal ye reḳhta ye sher-ḳhvānī phir kahāñ

siina dahak rahā ho to kyā chup rahe koī
kyuuñ chīḳh chīḳh kar na galā chhīl le koī

saaqī ye ḳhamoshī bhī to kuchh ġhaur-talab hai
saaqī tire mai-ḳhvār baḌī der se chup haiñ

har ek baat ko chup-chāp kyuuñ sunā jaa.e
kabhī to hausla kar ke nahīñ kahā jaa.e

kyā ḳhuub tum ne ġhair ko bosa nahīñ diyā
bas chup raho hamāre bhī muñh meñ zabān hai

kyā kaheñ kuchh kahā nahīñ jaatā
ab to chup bhī rahā nahīñ jaatā

chup-chāp apnī aag meñ jalte raho 'farāz'
duniyā to arz-e-hāl se be-ābrū kare

hai kuchh aisī hī baat jo chup huuñ
varna kyā baat kar nahīñ aatī

ālam-e-hū meñ kuchh āvāz sī aa jaatī hai
chupke chupke koī kahtā hai fasāna dil kā

chup chup makān rāste gum-sum niDhāl vaqt
is shahr ke liye koī dīvānā chāhiye

kyuuñ sharīk-e-ġham banāte ho kisī ko ai 'qatīl'
apnī suulī apne kāñdhe par uThāo chup raho

chapātiyāñ thiiñ bañdhī peT par magar shab-bhar
ubhartā Dūbtā maiñ bhuuk ke bhañvar meñ rahā

maqtal-e-vaqt meñ ḳhāmosh gavāhī kī tarah
dil bhī kaam aayā hai gumnām sipāhī kī tarah

ai zulm ke maato lab kholo chup rahne vaalo chup kab tak
kuchh hashr to un se uTThegā kuchh duur to naale jā.eñge

merī ḳhāmoshiyoñ meñ larzāñ hai
mere nāloñ kī gum-shuda āvāz

is ahd-e-zulm meñ maiñ bhī sharīk huuñ jaise
mirā sukūt mujhe saḳht mujrimāna lagā

mustaqil boltā hī rahtā huuñ
kitnā ḳhāmosh huuñ maiñ andar se