qaid kyaa dair-o-haram ki zaahido — Rohit Rahi

paarsaai kaa tujhe 'rohit' milegaa kyaa samar
kahte hain duniyaa jise sadiyon se be-tartib hai

in bahaaron ki havaaon ko shikaayat ham se hai
ham kali ko lams se gul karte hain jaan-e-jigar

'ishq ki fitrat sadaa aazaad hai
qaid mein dair-o-haram ki kab rahaa

huun khafaa saare zamaane se faqat tere liye
'ishq ki tauhid mere tu kabhi to jaanegaa

ham-mizaaji kaa na yuun daa'vaa karo
aashnaa honaa miraa aasaan nahin

pattharon ke ye sanam sunte hain kab
kaifiyat apni khudaa hi jaane hain