khat-e-shauq ko paDh ke qaasid se bole — Saail Dehlvi

aah kartaa huun to aate hain pasine un ko
naala kartaa huun to raaton ko vo Dar jaate hain

tumhein parvaa na ho mujh ko to jins-e-dil ki parvaa hai
kahaan DhunDun kahaan pheinki kahaan dekhun kahaan rakh di

janaab-e-shaikh mai-khaane mein baiThe hain barahna-sar
ab un se kaun puchhe aap ne pagDi kahaan rakh di

hain e'tibaar se kitne gire hue dekhaa
isi zamaane mein qisse isi zamaane ke

mohtasib tasbih ke daanon pe ye gintaa rahaa
kin ne pi kin ne na pi kin kin ke aage jaam thaa

ye masjid hai ye mai-khaana taajjub is par aataa hai
janaab-e-shaikh kaa naqsh-e-qadam yuun bhi hai aur yuun bhi