DhunDaa kiye khudaa ko magar mil nahin sakaa — Sahar Alig

sharm-o-hayaa ne baaz rakhaa is qadar hamein
saayaa bhi un kaa dekh ke ham sar-nigun karein

main duniyaa chaahti huun na duniyaa ki rif'atein
meri talab najaat hai bas aur kuchh nahin

Dhal gai vasl ki shab Duub gayaa dil kaa charaagh
ab vahin baiThe rahein aap jahaan the baiThe

ek moti huun main moti bhi baDaa qimti huun
par vo moti jo abhi gum hai samundar mein kahin

shaahzaade hon vali hon ki sukhan-daan-e-shahr
jab vo dikhtaa hai koi aur kahaan dikhtaa hai

ye jabr hai 'izzat hai mohabbat hai ki kyaa hai
banti hi nahin aap se inkaar ki surat