maal-o-zar ahl-e-duval saamne yuun ginte hain — Salik Lakhnavi

aaj bhi hai vahi maqaam aaj bhi lab pe un kaa naam
manzil-e-be-shumaar-gaam apne safar ko kyaa karun

— Salik Lakhnavi

dil ne siine mein kuchh qaraar liyaa
jab tujhe khuub saa pukaar liyaa

— Salik Lakhnavi

mai-khaana-e-hasti mein saaqi ham donon hi mujrim hain shaayad
khum tu ne bachaa ke rakkhe the paimaane main ne toDe hain

— Salik Lakhnavi

apni khuddaari salaamat dil kaa aalam kuchh sahi
jis jagah se uTh chuke hain us jagah phir jaaein kyaa

— Salik Lakhnavi

miT chuke jo bhi the tauba-shikani ke asbaab
ab na mai-khaana na paimaana na shisha na subu

— Salik Lakhnavi

bahaar-e-gulistaan ham ko na pahchaane taajjub hai
gulon ke rukh pe chhiDkaa hai bahut khun-e-jigar ham ne

— Salik Lakhnavi

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

ret par ik nishaan hai shaayad
ye hamaaraa makaan hai shaayad

— Muzaffar Abdali

ghulaami mein na kaam aati hain shamshirein na tadbirein
jo ho zauq-e-yaqin paidaa to kaT jaati hain zanjirein

— Allama Iqbal

kaho kyaa mehrbaan naa-mehrbaan taqdir hoti hai
kahaa maan ki duaaon mein baDi taasir hoti hai

— Anjum Khaleeq

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

— Irfan Sattar

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

— Parveen Shakir