Sufi

banā kar faqīroñ kā ham bhes 'ġhālib'
tamāshā-e-ahl-e-karam dekhte haiñ

tamannā dard-e-dil kī ho to kar ḳhidmat faqīroñ kī
nahīñ miltā ye gauhar bādshāhoñ ke ḳhazīnoñ meñ

zamīr-e-lāla mai-e-lāl se huā labrez
ishāra paate hī suufī ne toḌ dī parhez

be-zarī fāqa-kashī muflisī be-sāmānī
ham faqīroñ ke bhī haañ kuchh nahīñ aur sab kuchh hai

ye masā.il-e-tasavvuf ye tirā bayān 'ġhālib'
tujhe ham valī samajhte jo na bāda-ḳhvār hotā

kise ḳhabar ki safīne Dubo chukī kitne
faqīh o suufī o shā.ir kī nā-ḳhush-andeshī

hakīm o aarif o suufī tamām mast-e-zahūr
kise ḳhabar ki tajallī hai ain-e-mastūrī

ḳhudāvandā ye tere sāda-dil bande kidhar jaa.eñ
ki darveshī bhī ayyārī hai sultānī bhī ayyārī

qāsidā ham faqīr logoñ kā
ik Thikāna nahīñ ki tujh se kaheñ

ham faqīroñ se be-adā.ī kyā
aan baiThe jo tum ne pyaar kiyā

amīr-zādoñ se dillī ke mil na tā-maqdūr
ki ham faqīr hue haiñ inhīñ kī daulat se

ek darvesh ko tirī ḳhātir
saarī bastī se ishq ho gayā hai

ho gayā huuñ maiñ naqāb-e-rū-e-raushan par faqīr
chāhiye tah-band mujh ko chādar-e-mahtāb kā

harba hai āshiqoñ kā faqat āh-e-pechdār
darvesh log rakhte haiñ jaise hiran kī shāḳh

gumāñ kis par kareñ suufī idhar hai us taraf vaa.iz
ḳhudā rakkhe mohalle meñ sabhī allāh vaale haiñ

us ke dar par maiñ gayā saañg banā.e to kahā
chal be chal duur ho kyā le ke faqīrī aayā

sab pe khulne kī hameñ hī aarzū shāyad na thī
ek do hoñge ki ham jin par faqīrāna khule

do-shāla shaal kashmīrī amīroñ ko mubārak ho
galīm-e-kohna meñ jaaḌā faqīroñ kā basar hogā

darvesh nazar aatā thā har haal meñ lekin
'sājid' ne libās itnā bhī saada nahīñ pahnā

jis din se apnā tarz-e-faqīrāna chhuT gayā
shāhī to mil ga.ī dil-e-shāhāna chhuT gayā