main par-shikasta na thaa baadalon ke biich magar — Syed Amin Ashraf

is tarah chashm-e-nim-vaa ghaafil bhi thi bedaar bhi
jaise nasha ho raat kaa yaa subh kaa taDkaa huaa

— Syed Amin Ashraf

hai taa-hadd-e-imkaan koi basti na bayaabaan
aankhon mein koi khvaab dikhaai nahin detaa

— Syed Amin Ashraf

ik chaand hai aavaara-o-betaab o falak-taab
ik chaand hai aasudgi-e-hijr kaa maaraa

— Syed Amin Ashraf

lazzat-e-did khudaa jaane kahaan le jaae
aankh hoti hai to hotaa nahin qaabu dil par

— Syed Amin Ashraf

kisi se ishq ho jaane ko afsaana nahin kahte
ki afsaane mata-e-kucha-o-baazaar hote hain

— Syed Amin Ashraf

kahin bhi taair-e-aavaara ho magar tai hai
jidhar kamaan hai udhar jaaegaa kabhi na kabhi

— Syed Amin Ashraf

main baDaa ho gayaa huun magar bachpanaa
mere dil se kabhi bhi gayaa hi nahin

— Divyansh Rawat

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

— Shakeel Badayuni

main badalte hue haalaat mein Dhal jaataa huun
dekhne vaale adaakaar samajhte hain mujhe

— Shahid Zaki

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

— Nida Fazli

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai

— Zafar Iqbal