main badalte hue haalaat mein Dhal jaataa huun — Shahid Zaki

yaar bhi raah ki divaar samajhte hain mujhe
main samajhtaa thaa mire yaar samajhte hain mujhe

phalon ke saath kahin ghonsle na gir jaaein
khayaal rakhtaa huun patthar uchhaaltaa huaa main

laashon mein ek laash miri bhi na ho kahin
taktaa huun ek ek ko chaadar uThaa ke main

abhi to pahle paron kaa bhi qarz hai mujh par
jhijak rahaa huun nae par nikaaltaa huaa main

main sar-ba-sajda sakun mein nahin safar mein huun
jabin pe daagh nahin aabla banaa huaa hai

bin maange mil rahaa ho to khvaahish fuzul hai
suraj se raushni ki guzaarish fuzul hai

main baDaa ho gayaa huun magar bachpanaa
mere dil se kabhi bhi gayaa hi nahin

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

badalte vaqt ne badle mizaaj bhi kaise
tiri adaa bhi gai meraa baankpan bhi gayaa

na ho ehsaas to saaraa jahaan hai be-his-o-murda
gudaaz-e-dil ho to dukhti ragein milti hain patthar mein

barsaat kaa baadal to divaana hai kyaa jaane
kis raah se bachnaa hai kis chhat ko bhigonaa hai

'saif' andaaz-e-bayaan rang badal detaa hai
varna duniyaa mein koi baat nai baat nahin