hai taa-hadd-e-imkaan koi basti na bayaabaan — Syed Amin Ashraf

is tarah chashm-e-nim-vaa ghaafil bhi thi bedaar bhi
jaise nasha ho raat kaa yaa subh kaa taDkaa huaa

main par-shikasta na thaa baadalon ke biich magar
miri uDaan kaa zanjir se lipaT jaanaa

ik chaand hai aavaara-o-betaab o falak-taab
ik chaand hai aasudgi-e-hijr kaa maaraa

lazzat-e-did khudaa jaane kahaan le jaae
aankh hoti hai to hotaa nahin qaabu dil par

kisi se ishq ho jaane ko afsaana nahin kahte
ki afsaane mata-e-kucha-o-baazaar hote hain

kahin bhi taair-e-aavaara ho magar tai hai
jidhar kamaan hai udhar jaaegaa kabhi na kabhi

mere khvaabon ke jharokon ko sajaate rahiye
na sahi vasl magar yaad to aate rahiye

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne

afsos umr kaT gai ranj-o-malaal mein
dekhaa na khvaab mein bhi jo kuchh thaa khayaal mein

samand-e-khvaab vahaan chhoD kar ravaana huaa
jahaan suraagh-e-safar koi naqsh-e-paa na huaa

aankhon mein jo bhar loge to kaanTon se chubheinge
ye khvaab to palkon pe sajaane ke liye hain