us se bachhDaa to yuun lagaa jaise — Syed Shakeel Desnavi

'shakil' hijr ke zinon pe ruk gaiin yaadein
isi maqaam par aa kar Thahar gai shab bhi

rishta rahaa ajiib miraa zindagi ke saath
chaltaa ho jaise koi kisi ajnabi ke saath

ahrman kaa raqs-e-vahshat har gali har moD par
barbariyyat dekh kar hai khud qazaa sahmi hui

maut ke khunkhaar panjon mein sisakti hai hayaat
aaj hai insaaniyat ki har adaa sahmi hui

gard-e-safar ke saath thaa vaabasta intizaar
ab to kahin ghubaar bhi baaqi nahin rahaa

phir koi choT ubhri dil mein kasak si jaagi
yaadon ki aaj shaayad purvaai chal rahi hai