phir koi choT ubhri dil mein kasak si jaagi — Syed Shakeel Desnavi

'shakil' hijr ke zinon pe ruk gaiin yaadein
isi maqaam par aa kar Thahar gai shab bhi

rishta rahaa ajiib miraa zindagi ke saath
chaltaa ho jaise koi kisi ajnabi ke saath

ahrman kaa raqs-e-vahshat har gali har moD par
barbariyyat dekh kar hai khud qazaa sahmi hui

maut ke khunkhaar panjon mein sisakti hai hayaat
aaj hai insaaniyat ki har adaa sahmi hui

gard-e-safar ke saath thaa vaabasta intizaar
ab to kahin ghubaar bhi baaqi nahin rahaa

us se bachhDaa to yuun lagaa jaise
koi mujh mein bikhar gayaa saahab

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

jab bhi ghairon ki inaayat dekhi
ham ko apnon ke sitam yaad aae

choT jab dil par lage fariyaad paidaa kyuun na ho
ai sitam-aaraa jo aisaa ho to aisaa kyuun na ho

hasin yaadon ke chaand ko alvidaaa kah kar
main apne ghar ke andhere kamron mein lauT aayaa

mujh ko maalum thaa ik roz chalaa jaaegaa!
vo miri umr ko yaadon ke havaale kar ke