uThte jaate hain bazm-e-aalam se — Taashshuq Lakhnavi

gayaa shabaab par itnaa rahaa taalluq-e-ishq
dil o jigar mein tapak gaah gaah hoti hai

ham kis ko dikhaate shab-e-furqat ki udaasi
sab khvaab mein the raat ko bedaar hamin the

paD gai kyaa nigah-e-mast tire saaqi ki
laDkhaDaate hue mai-khvaar chale aate hain

jalungaa main ki dil us but kaa ghair par aayaa
uDegi aag ki patthar giraa hai patthar par

charaagh-e-daagh main din se jalaae baiThaa huun
sunaa hai jo shab-e-furqat siyaah hoti hai

baar-e-khaatir hi agar hai to inaayat kiije
aap ko husn mubaarak ho miraa dil mujh ko